Шефот на дипломатијата Османи денеска имаше и обраќање пред пред министрите за надворешни работи и претставниците на земјите учеснички на конференцијата на ОБСЕ во Лоѓ, Полска во кое се задржа на состојбите со кои се соочува Организацијата и актуелните политички и безбедносни предизвици
Поддршката на Украина ќе биде главен приоритет и за време на претседавањето на С Македонија со ОБСЕ, следната година, посочил шефот на македонската дипломатија Бујар Османи на билатералната средба со својот украински колега Дмитро Кулеба на маргините на министерската конференција на ОБСЕ што денеска и утре со одржува во градот Лоѓ, Полска.
На средба, како што соопшти МНР, Османи ја реафирмираше недвосмислената поддршка на Северна Македонија за суверенитетот и територијалниот интегритет на Украина, како и солидарноста со украинскиот народ во нивната борба за враќање на слободата и надминување на последиците од руската воена агресија.
“Нашите напори ќе бидат фокусирани на обезбедување континуирано присуство и ангажман на ОБСЕ во Украина, обезбедување програмска поддршка во сите три димензии преку новоформираната Програма за поддршка за Украина како и праќање на специјален претставник на претседавачот на ОБСЕ, за политичко известување”, истакнал Османи на средбата.
Воедно, тој изразил подготвеност, идната година да ги стави во функција сите капацитети и механизми на ОБСЕ, за помош на засегнатото население во Украина во справувањето со предизвиците кои произведуваат од енергетската и прехранбената криза.
Шефот на дипломатијата Османи денеска имаше и обраќање пред пред министрите за надворешни работи и претставниците на земјите учеснички на конференцијата на ОБСЕ, во кое, како се задржа на состојбите со кои се соочува Организацијата и актуелните политички и безбедносни предизвици.
“Со долгогодишното непочитување и прекршување на договорените принципи и заложби на Организацијата, е силно нарушена нивната кохезивна сила и се подриени принципите на ОБСЕ како темел на европската безбедносна архитектура. Ваквите тенденции доживеаја врв со агресијата на Руската Федерација врз Украина“, истакна Османи.
Тој, во продолжение се осврна и на визијата на нашето претседавање со Организацијата во 2023 година.
„Велат, ОБСЕ е на крстопат. Верувам дека вистинската насока напред е да овозможиме ОБСЕ да може да функционира врз основа на својот полн капацитет и подготвеност да испорачува, во корист и подршка на граѓаните во ОБСЕ регионот. Организацијата да продолжи да и служи на целта за нејзино воспоставување, нудејќи релевантни вредности и принципи како темел на европската кооперативна безбедност, и платформа за дијалог како алатка за превенција и разрешување на конфликти”,
посочи Османи.