За време на средбата, Османи уште еднаш го изнел ставот оти Русија ја крши Повелбата на Обединетите нации со нејзиниот напад на Украина, како и основните принципи на меѓународното право и човековите права. Ваквата позиција, како што истакнал Османи, Северна Македонија ќе ја задржи како земја претседавач со ОБСЕ
Шефот на дипломатијата Бујар Османи во рамки на својата посета на Украина во својство на претседавач со ОБСЕ, освен со украинскиот претседател Володимир Зеленски и шефот на украинската дипломатија Дмитро Кулеба, средба оствари и со претседателот на Врховната Рада на Украина, Руслан Стефанчук.
За време на средбата, Османи уште еднаш го изнел ставот оти Русија ја крши Повелбата на Обединетите нации со нејзиниот напад на Украина, како и основните принципи на меѓународното право и човековите права.
Ваквата позиција, како што истакнал Османи, Северна Македонија ќе ја задржи како земја претседавач со ОБСЕ.
„Го преземавме претседавањето со ОБСЕ во време на најтешката безбедносна и геополитичка криза по Втората светска војна. Сепак, ќе се посветиме на изнаоѓање дипломатски решенија без разлика колку се компликувани состојбите на терен“,
порачал Османи.
Претседавачот со ОБСЕ вчера се сретна со претседателот на Украина, Володимир Зеленски, а на средбата порачал оти е импресивна неговата пожртвуваност и посветеност во заштита на украинскиот народ.
Османи воедно ја изразил својата поддршка за украинската влада нагласувајќи дека ОБСЕ ги поддржува украинскиот народ и напорите за враќање на мирот и стабилизација на регионот.
Дека фокусот на претседавањето на Северна Македонија со ОБСЕ ќе биде состојбата во Украина, Османи порача и на средбата со неговиот колега, министерот за надворешни работи на Украина, Дмитро Кулеба.