Тоа веќе го имавме на минатите избори. Актуелниот претседател е заеднички кандидат на СДСМ и ДУИ, што е еден преседан кој навистина многу држави го посакуваат, а тоа е двете најголеми етнички заедници да имаат заеднички кандидат за претседател. Ние можеме тоа да го потцениме, но тоа е навистина најголемото постигнување на едно мултиетничко општество и мислам дека тоа се покажа како добар пример и не исклучувам тоа да се повтори, вели Oсмани во интервју за „Фронтлајн“
Уставните измени се прашањето што ќе го откочи процесот, односно ќе го овозможи продолжувањето на патот кон Европската Унија. Сметам дека треба сите пред граѓаните да излеземе и да покажеме дали стоиме зад нивната волја да станеме членка на ЕУ, вели министерот за надворешни работи Бујар Османи во интервју за „Фронтлајн“.
Тој истакнува дека опозицијата целосно ја става европската перспектива на државата во функција на наредните избори.
„Имате политички партии што упорно го кочат тој процес и затоа сметам дека треба пред граѓаните да излеземе со јасна порака. Дали поддржувате политички структури што сакаат државата да биде членка на Европската Унија или поддржувате политички структури што сметаат дека треба да има алтернативни структури од типот на средбата на рускиот претседател со севернокорејскиот претседател и таму да се зацртува една нова алтернатива на Европската Унија. Затоа сметаме дека сега е време сите политички партии кои што се залагаат за ЕУ да бидат дел од европскиот фронт. Другите нека си направат свој фронт па да излеземе пред граѓаните и да избираат граѓаните. Дали сакаат Европска Унија или ја сакаат таа коалиција којашто се сретна скоро во Русија“,
вели министерот Османи.
Според него, Русија не може да е алтернатива на Европската Унија, затоа што не може да нуди алтернатива.
„Сте виделе ли некој да оди да работи или да бара школување во Русија? Одат во Европската Унија, затоа што ние сме еден ист систем на вредности, географски, културолошки, економски, историски ние му припаѓаме на ова семејство на вредности на ЕУ“,
вели шефот на дипломатијата.
Според Османи, премногу сме мали, премногу зависни, премногу, како што вели во интервјуто, ранливи, без тој голем систем што го нуди ЕУ и тоа, подвлекува, не сме го констатирале ние, туку го констатирале многу поголеми држави во ЕУ.
Говорејќи за „Фронтот за Европа“, идеја што ја промовира лидерот на Демократската унија за интеграција, Али Ахмети, министерот Османи нагласува дека, засега на државно ниво се води координацијата со сите политички партии, независно од етничка или каква било припадност, но важно е дали тие се залагаат за членство во Европска Унија или не.
„Се разбира дека на ниво на политичката партија работиме со албанските политички партии во моментот кои се залагаат за ЕУ, за создавање на тој фронт, а се разбира како ќе се ближат изборите, тогаш ќе се прошири или евентуално ќе се разговара и со други партии“,
посочува министерот за надворешни работи.
Османи не ја исклучува можноста „Фронтот за Европа“ да настапи со заеднички кандидат на претседателските избори следната година.
„Тоа веќе го имавме на минатите избори. Актуелниот претседател е заеднички кандидат на СДСМ и на ДУИ, што е еден преседан којшто навистина многу држави го посакуваат, а тоа е двете најголеми етнички заедници да имаат заеднички кандидат за претседател. Ние можеме тоа да го потцениме, но тоа е навистина најголемото постигнување на едно мултиетничко општество и мислам дека тоа се покажа како добар пример и не исклучувам тоа да се повтори“,
изјави Османи.
На прашањето дали и што ќе решат евентуални предвремени избори и дали тоа е политички трик да се блокираат процесите дополнително, Османи е дециден дека тие нема да сменат ништо од преговарачката рамка.
„Преговарачка рамка е усвоена од 27 земји членки, таа не може да се промени. Но, преговарачката рамка е компромис којшто сме го прифатиле, затоа што сметавме дека е во наш интерес тоа што овие историски и идентитетски прашања не влегоа во преговарачката рамка. Прашањето за јазикот се утврди, како конечно решение без никакви додавки. Потоа историските прашања не влегуваат во делот на преговарачката рамка за коишто има писмен извештај од Европската комисија, за кои се гласа во Европскиот совет, туку влегоа само малцинските права и човековите права, Значи, Уставни измени и акциски план за малцинства. Тоа е наше свесно поместување на тежиштето на процесот во поле каде што нас ни одговара. Затоа што ние сме најдобри во човековите права, ние сме најдобри во колективните права и сакаме да играме на терен каде што ние сме најдобри, а не на терен каде што нема објективна проценка и фактот дека сме во асиметрична позиција они во ЕУ ние надвор секако ние ќе бидеме оштетени од тој процес. Значи или опозицијата не го разбира ова прашање, или единствено желбата за власт ги има заслепено, па прават голема штета на интересите на граѓаните и на државата со евентуалниот неуспех на уставните измени“,
нагласува Османи.