Коментирајќи го ставот на Каракачанов дека земјава има ултиматум до петок да ги прифати бугарските барања, министерот за надворешни работи рече дека нема таков рок
Во Софија имавме отворен и конструктивен разговор по однос на сите прашања, отворено за сите загрижености и чувствителности на двете страни и мислам дека беше добра основа да се продолжи понатаму, порача вечерва министерот за надворешни работи, Бујар Османи во гостување на ТВ 24.
Тој вели дека се уште е неизвесно дали во декември ќе ги почнеме преговорите за членство во Европската Унија и дали Бугарија ќе го искористи своето право на вето.
„Одлуката се носи на Совет на министри за европски прашања и надворешни работи којшто требаше да биде на 10 ноември, меѓутоа е одложен од Претседателството првично на 17 ноември и со тоа се добиваат дополнителни денови за усогласување помеѓу земјите членки по однос на текстот на рамката. Не можам да прејудицирам сто проценти во моментов каква ќе биде одлуката на 27 земји членки. Тоа што знам е дека ние ќе работиме до последната минута од последниот ден за да можеме да испорачаме“,
рече Османи.
Османи дека во Софија се разговарало и за барањата на бугарската страна и додаде дека тие сметаат оти работата на комисиите не била доволна за да кажат дека даваат резултат.
Сепак, Османи вели дека има одредени исчекори напред за надминување на недоразбирањата.
„Разговаравме отворено. Остануваат овие денови да се искористат меѓусебната комуникација помеѓу групите. Направивме пресек на тоа што е постигнато. Сепак, има одредени исчекори напред во надминување на загриженостите. Зборувавме за достоинствени разговори помеѓу двете држави. Продолжуваат преговорите до последната минута пред одржувањето на самитот. Претпоставувам дека очекувате јас денеска да влегувам во детали. Нема да помогнам бидејќи реков ова е работа која што е во тек и можеме негативно да влијаеме, а многу ни е важна на сите“,
истакна Османи.
Според него, неопходно е да има внатрешна кохезија во земјава за да се реши едно комплексно прашање како што е ова и додаде дека смета оти и опозицијата треба да биде вклучена. Сепак, истакна дека се уште не одлучил дали ќе учествува на седницата на собраниската Комисијата за надоврешни прашања во четврток за односите со Бугарија.
„Не сум сигурен дали е зрел моментот да се искажува јавно мислење“,
рече Османи.
За ставот на Каракачанов дека земјава има ултиматум до петок да ги прифати бугарските барања, министерот за надворешни работи рече дека нема таков рок. Следниот рок, како што кажа, е 17 ноември кога е седницата на Советот на министри, а доколку дотогаш не се реши проблемот останува тоа да се направи до декември.
Тој додаде дека Германското претседателство работи принципиелно за да се најде решение внимавајќи на чувствителноста кон двете страни.