„Проширувањето на ЕУ е еден од најуспешните мировни проекти на европскиот континент кој носи незаменлива вредност во градењето отпорни општества и постигнувањето економски напредок и просперитет“, вели Османи
Претседавачот на Процесот за соработка во Југоисточна Европа (ПСЈИЕ) и министер за надворешни работи, Бујар Османи денеска ја отвори пленарната сесија на министерскиот состанок, што се одржува во рамките на нашето едногодишно претседавање со Процесот, под мотото „Премостувајќи поделби, градејќи доверба”.
Османи, заблагодарувајќи се за поддршката од Советот за регионална соработка (RСС) при реализирање на активностите, како што соопшти МНР, истакнал дека зад нас останува една успешна година, со бројни постигнувања на полето на регионалната соработка, а особено значаен, како што вели, е постигнатиот консензус за избор на нов генерален секретар на Советот.
„Да ги наведам уште еднаш нашите основачки документи кои укажуваат на основната цел на нашиот регионален процес: ‘Добрососедски односи, стабилност, безбедност и соработка во Jугоисточна Eвропа’ и стремежот за ‘Интегрирање на нашите земји во евроатлантското семејство на слободни и демократски нации’, кои се релевантни и применливи денес, исто како и во минатото“,
нагласи Османи.
Османи рече дека учесниците во Процесот имаат постигнато важни резултати во бројни области, но дека мораат да ги удвојат напорите до крајната цел – членство во ЕУ за сите учесниците на ПСЈИЕ.
„Проширувањето на ЕУ е еден од најуспешните мировни проекти на европскиот континент кој носи незаменлива вредност во градењето отпорни општества и постигнувањето економски напредок и просперитет“,
истакна Османи, повторувајќи дека повеќе интеграција пред членството претставува соодветно решение за долгогодишните предизвици со кои се соочуваме.
По Османи на сесијата треба да се обратат шефовите на делегации на 13 учесници, претставници на ЕУ и Советот, по што агендата треба да продолжи со усвојување на Годишниот извештај на Советот, дискусија на тема избор на генерален секретар и одобрување на Декларацијата на Самитот на шефови на држави и влади на учесниците на Процесот за соработка на Југоисточна Европа (ПСЈИЕ), што ќе се одржи попладнево.
Претседателката Гордана Сиљановска-Давкова ќе биде домаќин на Самитот на шефови на држави и влади на учесниците во ПСЈИЕ, во рамките на кој, како што најавија од претседателскиот кабинет, е предвиден пленарен состанок на шефовите на делегациите, по што ќе следува заедничка прес-конференција на актуелниот, претходниот и идниот претседавач со Процесот за соработка во Југоисточна Европа.