Во пресрет на утрешниот состанок на ПСЈИЕ во Скопје, со кој се заокружува едногодишното претседавање на земјава со Процесот, Османи информира дека денеска бил постигнат консензус и номиниран кандидатот на Сараево, Амер Капетановиќ, за нов генерален секретар на Советот за регионална соработка како извршно тело на Процесот
По претседавањето со ОБСЕ, изброт на нов генерален секретар на Советот за регионална соработка (РСС) во Скопје е уште еден успех на С Македонија со кој се потврдува нејзината позиција на меѓународната сцена. Ова денеска го порача сè уште актуелниот министер за надворешни работи Бујар Османи, но во својство на претседавач со Процесот за соработка на Југоисточна Европа (ПСЈИЕ).
Во пресрет на утрешниот состанок на ПСЈИЕ во Скопје, со кој се заокружува едногодишното претседавање на земјава со Процесот, Османи информира дека денеска бил постигнат консензус и номиниран кандидатот на Сараево, Амер Капетановиќ, за нов генесек на Советот за регионална соработка како извршно тело на Процесот.
„Задоволство ми е што успеавме да постигнеме консензус и го номиниравме Амер Капетановиќ за нов генерален секретар на РСC. Како претседавачи со Процесот сме особено горди на ова постигнување. Со овој чин, ние – учесниците во Процесот, покажавме дека сме способни да го сочуваме кредибилитетот на регионалната сопственост и лидерството кои ги градевме и надградувавме низ годините наназад преку оваа значајна регионална иницијатива”,
порача Османи во обраќањето на Годишниот состанок на Советот за Регионална соработка (РСС).
„Уште еден успех за Република Северна Македонија после претседавањето со ОБСЕ во 2023 година. Нашата земја, уште еднаш, ја потврди својата позиција на меѓународната сцена“,
рече Османи на прес-конференцијата во МНР.
Под мотото „Премостување на поделбите, градење доверба“, утре и задутре во Скопје се одржува состанок во рамки на финалните активности на претседавањето на С Македонија со Процесот за соработка во Југоисточна Европа (ПСЈИЕ). Темата на годинашниот состанок е „Зајакнување на регионалната безбедносна инфраструктура загрозена од актуелните предизвици – Како да продолжиме понатаму?“.
На Самитот на шефови на држави и влади на учесниците на ПСЈИЕ учество ќе земат делегациите на 13 учесници на Процесот, претставници на Европската Унија и Регионалниот совет за соработка (РСС).