Шефот на дипломатијата не гледа пречки Бугарите да бидат вклучени во македонскиот Устав и смета дека, како што Албанците и другите заедници имале корист од Рамковниот договор, така и Бугарите би можеле да бидат вклучени во него
Министерот за надворешни работи Бујар Османи во интервју за утринската програма на бугарската телевизија БТВ вели дека би било добра идеја за преговорите меѓу Софија и Скопје, доколку и Бугарија, како и Македонија, направи измени во составот на Мешовитата комисија за историски прашања.
„Во време кога климата се влошува, а историчарите губат храброст и се трудат да не ги попречуваат политичарите, во овие повеќе од две години, можеме да направиме анализа на досегашното искуство, без да земеме конкретен пример. Досега сменивме двајца претставници во Комисијата, Бугарија нема промена во составот, можеби треба да има корист од нашето искуство, но јас не прејудицирам таков чекор“,
вели Османи во интервју за БТВ.
Изјавата на Османи следува една недела по посетата на бугарскиот премиер на Скопје и еден ден пред посетата на делегација од Македонија на Бугарија, при што во Софија двете влади ќе имаат заедничка седница.
Според Османи, симболиката во овие посети е многу силна и покажува дека двете држави се најблиски соседи и нагласува дека треба да се работи на создавање конструктивна атмосфера на доверба и продолжување на разговорите.
Тој коментираше и за едно од главните барања од бугарската страна за укинување на ветото за Македонија за почеток на преговорите за членство во ЕУ – вклучување на бугарското малцинство во македонскиот Устав.
„Република Северна Македонија во светот е позната по степенот на колективните права на граѓаните, особено по потпишувањето на Рамковниот договор со кој се воспоставија односи меѓу државата и етничките заедници. Не гледам ништо проблематично за која било друга етничка заедница да се вклучи, да се интегрира, но и да покаже одговорност и лојалност кон државата. Конкретно, можам да зборувам за Рамковниот договор, како претставник на етничка заедница која имаше корист од Рамковниот договор, но тоа не беше само за Албанците и Турците, Србите, Власите и Ромите, туку може и Бугарите станат дел од него“,
рече министерот.
Османи истакна дека очекувањата за постигнатите резултати не ја засегаат само Северна Македонија туку и Бугарија.
„Во односите меѓу двете земји се очекуваат резултати од двете страни. На пример, патната врска меѓу Скопје и Софија не може да биде само наша заложба. Граничниот премин ‘Клепало’ е завршен, очекуваме да биде завршен и од ваша страна. Сметам дека нашите односи не можат да се засноваат само на политичка доверба и политички договор. Мора да се потпреме на мрежа на соработка со контакти и врски. Луѓе, бизниси, универзитети кои ќе останат цврсто поврзани, дури и политичката соработка се наруши, оваа мрежа ќе остане силна“,
додаде тој.
Османи посочи дека сè уште нема конкретно име за амбасадор на Македонија во Бугарија. Според него, ова е пропуст, но изрази надеж дека во рок од неколку дена новата влада ќе соопшти конкретно име за оваа функција.