Според Ковачевски, сепак, сите овие прашања ќе бидат во втор план, а во прв план ќе биде градењето добрососедски односи и приближување на граѓаните, што ќе биде стимул и ќе даде аргументи за финален исчекор за постигнување договор и отпочнување на преговорите со ЕУ
Се надеваме дека членовите на историската комисија заеднички ќе информираат за договореното, што ќе биде мост кон иднината, а не враќање кон минатото, истакна македонскиот премиер
Историско-образовната комисија ќе продолжи да работи, според својот план за работа и врз основа на сработеното и планот и распоредот тие сами ќе треба да информираат што е договорено и како е договорено врз основа на тие факти на методологијата. Вака премиерот Димитар Ковачевски одговори на новинарско прашање дали денеска со својот бугарски колега Кирил Петков разговарале за историската комисија и дали таа понатаму ќе продолжи да работи.
„Со Петков договоривме да формираме работни групи од повеќе области: инфраструктура, економија, трговија, деловна соработка меѓу бизнисзаедниците, образование и култура и тука спаѓа и историско-образовната комисија. Таа веќе има свој план за работа и врз основа на сработеното и планот и распоредот тие сами ќе треба да информираат што е договорено и како го договориле врз основа на тие факти од методологијата и за тоа ќе ги информираат граѓаните“,
објасни Ковачевски и додаде дека сепак сите овие прашања ќе бидат во втор план, а во прв план ќе биде градењето добрососедски односи и приближување на граѓаните, што ќе биде стимул и ќе даде аргументи за финален исчекор за постигнување договор и отпочнување на преговорите со ЕУ.
Во однос на тоа дали ќе се менува форматот и составот на комисијата, Ковачевски рече дека денеска се зборувало за работните групи во кои освен политички претставници ќе има и претставници на секторите како професори или претставници на индустриски гранки.
„Овде денеска нема претставници на историската комисија, тие работат во подолг период и тоа го правата по своја методологија и дефинирање одредени факти што ги имаат зацртано согласно методологијата и се надеваме дека членовите на историската комисија заеднички ќе информираат за договореното, што ќе биде мост кон иднината, а не враќање кон минатото“,
рече Ковачевски.
Петков, пак, кажа дека се согласува дека за разлика од досегашниот начин, овие средби што ќе бидат на неделно ниво на сите комисии, вклучувајќи и историската, ќе се посвети внимание на работи што нѐ зближуваат, и ќе им се даде подолг рок, но ќе има средби и комуникација.
„Отсега натаму, кога ја ставивме историската комисија да биде една од петте комисии на заедничка работа, тие прашања што не се разјаснети ќе бидат разговарани во друга средина на дијалог и конструктивност. Ние одлучивме добрососедските односи да имаат сосема поинаква дефиниција од досега“,
истакна Петков.