Преговорите ќе ги надминат политичките мандати на една политичка партија. Ви гарантирам дека до 2030 година ќе има неколку влади од различна политичка провениенција. Мора да ги поделиме и одговорноста и заслугите за овој процес. Мора на крај граѓаните и државата да бидат победници од овој процес, нагласи министерот Османи
Министерот за надворешни работи Бујар Османи упати апел до опозицијата што поскоро сите заедно да седнат на заедничка маса и партиите да потпишат договор со кој ќе дадат поддршка на патот кон ЕУ.
„Доколку сакаме 2030 година да биде за во ЕУ, тогаш треба да си подадеме рака, меѓу власта и опозиција. Политичките партии треба да кажат дека оваа тема ќе ја тргнеме надвор од дневно-политичките препукувања. Нам ни треба нов рамковен договор за Европската Унија, партиите од која било страна на политичката сцена ќе склучат договор дека ќе се поддржуваме за прашање што се однесуваат на ЕУ“,
рече Османи на денешната прес-конференција.
Според него се има погрешна перцепција дека ние ќе преговараме со Унијата.
„Ние не преговараме со Унијата. Директивите и регулативите на ЕУ вие мора да ги прифатите. Независно кој е на власт, дали десничарска партија, дали левичарска партија, не може да преговара за некои директиви и регулативи на ЕУ. Прашањето на преговори е внатре во државата кога ќе сме спремни да ги прифатиме тие директиви, тоа се преговорите. Преговорите се внатре. Така што, бидејќи нема разлики во преговорите и целите, зошто треба да има разлики во пристапот меѓу различните политички партии“,
рече Османи.
Тој упати апел до сите политички партии да ја искористат оваа шанса, да седнат партиските лидери, да склучат меморандум, да склучат договор дека ќе се помагаат за прашања за Европската Унија независно кој е на власт.
„Преговорите ќе ги надминат политичките мандати на една политичка партија. Ви гарантирам дека до 2030 година ќе има неколку влади од различна политичка провениенција. Мора да ја поделиме и одговорноста и заслугите за овој процес. Мора на крај граѓаните и државата да бидат победници од овој процес. Еве повик уште еднаш како министер за надворешни работи дека времето е сега и секој еден ден губење во постигнување на договор ќе биде еден ден на одложување во постигнување на крајната цел, а тоа е членство во ЕУ“,
нагласи министерот додавајќи дека досега нема одговор од опозицијата дали се согласни на ова.
Тој додава дека рамковниот договор го споменува повеќе во контекст на тоа дека четирите партии седнаа потпишаа документ кој потоа стана обврска.
„Значи таква тежина на документ ни треба и ова го кажувам од перспектива на човек кој последните 5 години го води овој процес на ЕУ свесен за искуствата на другите држави и свесен дека нема друг начин. Ние може да импровизираме обиди за членство во ЕУ, ние може да создаваме перцепција за обиди, ако немаме таков договор државен помеѓу политичките партии ние нема да успееме. Еве тоа го кажувам јавно, ќе се гледаме после неколку години, но ако ова не го направиме, ние нема да успееме во напорите за членство во ЕУ“,
потенцираше Османи.
Според него, големината на политичарите ќе се види по тоа дали ќе излезат од своја кожа, од своите партиско-политички интереси и ќе си подадат рака.
„Историјата ќе ги цени по однос на тоа. По влегувањето во ЕУ, ќе се каже внатре сме затоа што пред 8 или 10 години некој направи ваков чекор. Таа шанса ја имаме сега и мојот апел до сите политички партии е да не доцниме уште еден ден, утре да седнеме и да потпишеме договор дека за ЕУ ќе немаме разлики, туку ќе работиме заедно. Механизмот е тој“,
нагласи Османи.
Дека на Северна Македонија е и потребно единство на патот кон ЕУ согласност даде и заменик-претседателката на Владата и министерка за надворешни работи на Словенија, Тања Фајон, која денеска беше во официјална посета на земјава.
Фајон рече дека Прашањето за членство во ЕУ во периодот кога Словенија станувала членка било тема, прашање кое ги спојувало владата, опозицијата и луѓето.
„Очекувам дека и во Северна Македонија ќе биде така. Треба да се концентрирате на исполнување на условите, пред се на промената на Уставот, тоа е нешто што може да се реализира. Затоа ги повикувам сите политички сили да го покажат патот на единството, одговорноста и посакуваме до промена на уставот да дојде согласно временската рамка, а тоа значи да може да продолжат преговорите, без да се доцни до крајот на скринингот на законодавството“,
рече Фајон.