Османи признава дека се чувствува тензија и, како што рече, едно ниво на недоразбирање во односите со Бугарија, како резултат на слабата комуникација
Треба да излеземе од чувството на немање самодоверба, бидејќи ние сме членка на НАТО и земја со одлука за почеток на преговори со ЕУ и мора да имаме самодоверба за нештата што сметаме дека се наша вредност, порача министерот за надворешни работи
Доколку поради забелешките од Бугарија до крајот на годината не се одржи првата меѓувладина конференција на нашата земја со ЕУ, тоа ќе се смета за неуспех на Берлинскиот процес, бидејќи идејата зад лансирање на оваа иницијатива е поттикнување на регионалната соработка и забрзување на евроинтеграциите на земјите од Западен Балкан. Во тој случај, товарот ќе биде на сите – и на нас, на Бугарија, и на германското претседателство, изјави денеска министерот за надворешни работи Бујар Османи на прес-конференцијата на која зборуваше за претстојниот самит на Берлинскиот процес во Софија на 10 ноември со заедничко македонско-бугарско претседавање, во контекст на тензиите во македонско-бугарските односи.
Тој уште еднаш повтори дека нема никаква конспирација од неговата посета на Софија минатата недела и дека основата порака е всушност онаа што произлегува од изјавата на бугарскиот премиер Борисов – дека не би сакал Бугарија да биде во позиција да ја блокира нашата европска перспектива.
Османи признава дека се чувствува тензија и, како што рече, едно ниво на недоразбирање во односите, кое според него лежи во недоволното ниво на комуникација што се должи на пандемијата и изборите.
„Ние се обидуваме со ладна глава да им пристапиме на овие недоразбирања. Од нивна страна има чувство дека има недоволна динамика на спроведувањето на Договорот, но од друга страна се нашите аргументи дека за 18 месеци има 9 средби на мешовитата комисија, што не е за потценување. Ова се тешки теми, членовите на комисијата не се политичари, тие се научници, живеат во поинаков свет и можеби тука се разликите во очекувањата. Но, сакаме да потенцираме дека немаме намера да го заобиколиме овој процес на имплементација, туку да ги охрабриме да најдат решение“,
рече Османи.
Османи, исто така, им се обрати на граѓаните да не создаваат мислење дека крајното решение ќе биде на штета на некои интереси.
„Знам дека во јавноста има таков страв, но убеден сум дека кое било решение ќе ја ослободи негативната енергија од нашите односи. Треба да излеземе од чувството на немање самодоверба, бидејќи ние сме членка на НАТО и земја со одлука за почеток на преговори со ЕУ и мора да имаме самодоверба за нештата што сметаме дека се наша вредност. Не смееме да дозволиме емоциите, дневно- политичките агенди, рецидивите од минатото да влијаат врз градење на посебноста врз антибугарски сентимент и дека некој сака да ни наштети“,
истакна Османи.
Во контекст на јавната прозивка од лидерот на ВМРО-ДПМНЕ Христијан Мицкоски дека Османи во Софија добил сет барања за нов договор и уставни промени, тој ја повика опозицијата да не навлегува во дневно-политичка битка за поени кога се работи за иднината на државата.
„Претседателот а ВМРО-ДПМНЕ го има мојот број и можеше да ме слушне пред јавно да ме прозива. Не е добро за овие прашања да се шпекулира и да се комуницира преку јавноста, туку важна е соработката и внатрешната кохезија“,
рече Османи.