Покрај компаниите, изречени се казни и за граѓани од по 250 евра, а во повеќе наврати кај инспекторите е пријавено палење оган на отворено и горење најразлични материјали
Инспекторат за животна средина на Општина Струмица за пет дена има изречено глоби на три компании од 9.000 евра и 500 евра за управителот на правниот субјект, додека на други им е наложено да постават филтри за да не го загадуваат амбиенталниот воздух.
Покрај компаниите, изречени се казни и за граѓани од по 250 евра, а во повеќе наврати кај инспекторите е пријавено палење оган на отворено и горење најразлични материјали.
Таков случај е забележан и денеска, кога по претходна пријава од општински инспектор, ТППЕ Струмица со едно против пожарно возило и тројца пожарникари гаснеле пожари на отворено меѓу селата Свидовица и Банско и во близина на Булеварот „Климент Охридски“ покрај одводниот канал. И на двете локации биле запалени сува трева, ѓубре и електричен столб. Пожарите се успешно локализирани за кратко време по пристигнувањето на пожарникарите.
Градоначалникот Костадин Костадинов соопшти дека само во текот на денот се спроведени осум вонредни инспекциски надзори на територија на општина Струмица и населените места.
„Два вонредни инспекциски надзори се направени кај правни субјекти – автомеханичарски работилници од кои кај една ќе биде донесено решение за отстранување на утврдената неправилност. Над три физички лица е извршен вонреден инспекциски надзор каде на лице место се затекнати лицата како спалуваат отпад од кои кај едно е повикано противпожарно возило да интервенира бидејќи пожарот беше зафатил огромна површина. За сите три лица од страна на инспекторот за животна средина ќе следува издавање на прекршочен платен налог согласно член 37 став (4) од Законот за управување со отпадот и казна од 250 евра“,
соопшти Костадинов.
Тој најави засилени вонредни контроли во наредниот период и апелираше на соработка со централната власт во борбата со загадувачите.