Против ова решение, додаваат од Основниот кривичен суд Скопје, странките имаат право на жалба пред Кривичниот совет
Триесетдневен притвор му е определен попладнево на врховниот судија Наке Георгиев, за кој постои основано сомнение за кривичното дело „примање награда за противзаконито влијание“. Мерката е определена откако тој беше изведен пред судија на претходна постапка при Основниот кривичен суд Скопје. Мерката е определена по предлог на Основното јавно обвинителство за гонење организиран криминал и корупција.
Од Основниот кривичен суд Скопје, преку соопштение, информираат дека против Н.Г. постои основано сомнение за кривичното дело Примање награда за противзаконито влијание од чл. 359 од Кривичниот законик.
„По произнесување на осомничениот во присуство на неговиот бранител, како и ценење на фактите и доказите приложени од страна на Јавниот обвинител донесе решение со кое предлогот се уважува, а на осомничениот му се определува мерка притвор во траење од 30 дена заради постоење на основите од член 165 ст. 1 точка 2 и 3 односно, може да ја попречи кривичната постапка со влијание врз сведоците, и околности кои упатуваат дека ќе го доврши или повтори кривичното дело“,
се вели во соопштението од Кривичен.
Против ова решение, додаваат оттаму, странките имаат право на жалба пред Кривичниот совет.
Воедно, од Кривичен информираат дека, по добивање на предлогот за определување мерка притвор против осомниченот, кој е актуелен Врховен судија, Кривичниот суд се обрати до Судскиот совет на РСМ како надлежен за одлучување во однос на имунитетот на судијата за што Советот донесе одлука која е јавно објавена, и со која се одзема неговиот имунитет како судија.
По добивање на одлуката на Судскиот совет, судијата на претходна постапка, се обрати и до надлежниот Апелационен суд Скопје, со оглед да член на потесното семејство на осомничениот е избран судија во Основниот кривичен суд Скопје кој веднаш по изборот е времено делегиран да постапува во друг суд, а со цел доследно почитување на Законските одредби и надлежноста во постапувањето.
„Од второстепениот суд е добиено решение според кое не постојат законски пречки судија на претходна постапка при Основниот кривичен суд Скопје да постапува по предлогот на ОЈО ГОК, по што е донесено горенаведеното решение“,
се додава во соопштението од Основен кривичен суд Скопје.
Врховниот судија Наке Георгиев попладнево е спроведен пред судија на претходна постапка во Основниот кривичен суд Скопје.
Основното јавно обвинителство за гонење на организиран криминал и корупцијата (ОЈО ГОКК) денеска преку соопштение официјално информира за вчерашната акција на МВР во која беше уапсен судијата Наке Георгиев. Против него, како што соопштија од Обвинителството, е покрената истрага поради основано сомнение за сторено кривично дело примање награда за противзаконито влијание од член 359 од Кривичниот законик.
Обвинителството побара и притвор за Георгиев кој, како што информираше и МВР вчера, бил затекнат при извршување на кривичното дело.
Покрај за Георгиев, ОЈО ГОКК отвори истрага и против уште едно лице поради сомнение за сторено исто кривично дело примање награда за противзаконито влијание.
Попладнево од Јавното обвинителство на Република Северна Македонија информираа дека до судија на претходна постапка јавен обвинител на ОЈО ГОКК доставил барање на членот и заменик-претседател на Советот на јавни обвинители, Иџет Мемети да му бидат одредени мерки за претпазливост.