Најнаселената покраина во Канада, Онтарио, најверојатно од денеска ќе ја прошири употребата на вакцината на „Астра Зенека“ за да спречи оптоварување на болниците во третиот бран на заразата.
Досега вакцината се употребуваше за лицата над 55 години, а сега ќе се употребува за лицата над 40 години, пишува „Ројтерс“ повикувајќи се на извор од владата. Одлуката, според овој медиум, најверојатно ќе биде донесена во текот на денот и „Астра Зенека“ веќе од утре ќе се користи и за лицата во возрасната група од 40 до 55 години.
Канадското независно советодавно тело за имунизација кон крајот на март препорача вакцината да се користи за лицата над 55 години. Регулаторното тело за лекови, пак, минатата недела соопшти дека нема да ја ограничи употребата на „Астра Зенека“ бидејќи придобивките од неа се поголеми од потенцијалните ризици. Сепак, советот на телото за имунизација ги следеше сите провинции, а според изворите на „Ројтерс“, Онтарио ќе ја промени одлуката и ќе ја намали возрасната граница.