Гутереш ги повика сите земји членки на ОН целосно и без одлагање да го финансираат повикот за помош за гарантирање на хуманитарната помош која, како што наведе, очајнички им е потребна на речиси пет милиони Сиријци и која вклучува засолништа, медицинска нега и храна
Обединетите нации упатија апел за 397 милиони долари за помош на жртвите од земјотресот во Сирија, каде што се загинати илјадници луѓе, а на милиони други им треба итна помош.
„Денеска објавувам дека ОН упатија хуманитарен апел за 397 милиони долари за населението погодено од земјотресот во Сирија. Тоа ќе биде доволно за три месеци“,
рече генералниот секретар на ОН, Антонио Гутереш.
Тој ги повика сите земји членки на ОН целосно и без одлагање да го финансираат повикот за помош за гарантирање на хуманитарната помош која, како што наведе, очајнички им е потребна на речиси пет милиони Сиријци и која вклучува засолништа, медицинска нега и храна.
„Потребите се огромни и сите знаеме дека спасувачката помош не доаѓа со потребната брзина или обем“,
рече генералниот секретар на ОН.
Затоа, како што рече Гутереш, имам итна порака до меѓународната заедница: човечкото страдање од оваа природна катастрофа не треба да биде уште полошо поради пречките создадени од човекот – пристап, финансирање, набавки.
„Помошта мора да помине од сите страни, до сите страни, преку сите рути – без никакви ограничувања. Ова е момент за единство, за заедничка хуманост и здружена акција“,
нагласи тој, истакнувајќи дека по границите на Сирија отворени се два дополнителни премини за да се овозможи поголема помош да стигне до местата погодени од земјотресот.
Тој истакна дека една недела по разорните земјотреси, милиони луѓе од регионот се борат да преживеат, без покрив над главата и се соочуваат со ниски температури.