Сите знаеме дека без победа нема да има мир. Тоа би бил лажен мир и нема да трае долго, вели сопругата на украинскиот претседател
Олена Зеленска, сопругата на украинскиот претседател Володимир Зеленски во интервју за Би-би-си ја споредува ситуацијата со војната во Украина со трчање маратон и потенцира дека оваа атлетска дисциплина е полесен предизвик.
Во интервјуто таа зборува за долгиот пат пред Украинците среде руската инвазија.
„Знаете, лесно е да се трча маратон кога знаете колку километри има“, вели Зеленска и додава дека за разлика од маратонот ситуацијата со војната во Украина е неодредена.
„Понекогаш може да биде многу тешко. Но, има некои нови емоции што ни помагаат да се одржиме“,
вели Зеленска.
Таа зборува и за тешкотиите со кои се соочила поради разделбата од сопругот.
Руските сили го назначија Зеленски и неговото семејство како цели.
„Јас живеам одвоено со моите деца, а мојот сопруг живее на работа. Најмногу ни недостасуваат едноставни работи – да седиме, да не гледаме во часовникот колку што сакаме“,
вели сопругата на украинскиот претседател.
Зеленска во интервјуто е категорична дека Украинците се решени да се борат понатаму.
„Сите знаеме дека без победа нема да има мир. Тоа би бил лажен мир и нема да трае долго“,
нагласува Зеленска.
Украина и вчера беше под жесток ракетен напад на руските сили, особено градот Херсон, од кој Русите се повлекоа пред две недели.
Најмалку четири лица загинаа, а десет беа ранети во нападите врз Херсон, кој главно е без струја и вода, еден ден по многубројните руски напади врз енергетска инфраструктура.
Точно девет месеци од почетокот на руската инвазија, милиони Украинци го поминаа четвртокот без струја и греење.
Во Киев, каде што замрзнат дожд падна врз снегот, а температурите беа блиску до нула, околу 70 отсто од населението остана без струја, а снабдувањето со вода се нормализира, соопшти градската управа.