Непочитувањето на забраната за движење во време на полицискиот час кој го прогласи Владата и започнува да важи од денеска во периодот од 21 до 6 часот, значи извршување на кривично дело, предупредуваат од Основното јавно обвинителството.
Оттаму велат, дека прекршувањето на полицискиот час во актуелната ситуација ќе се гони со кривична одговорност за делото непостапување според здравствените прописи за време на епидемија (член 206 од Кривичниот законик).
„Имено, за ова кривично дело се одговара кога за време на епидемија на некоја опасна заразна болест не се постапува според прописите или наредбите со кои се определуваат мерки за нејзиното сузбивање или спречување. За физичките лица предвидена е парична казна или затвор до една година“,
информираат од обвинителството.
За фирмите, пак, се предвидува парична казна и до 30 милиони денари (речиси 500 000 евра).