За утре пред Кривичниот суд во Скопје, пак, е најавен протест под слоганот „Стоп на лошите пресуди и стоп на сообраќајното насилство“ како знак на револт за изречената казна за сообраќајката
Основното јавно обвинителство (ОЈО) Скопје поднесе жалба до скопскиот Апелациски суд бидејќи е незадоволно од тригодишната затворска казна за возачот Јордан Ѓоргиев, кој ја прегази младата Викторија Николова кај трговскиот центар „Сити мол“, која почина на самото место.
Обвинителот смета дека казната е неадекватна и дека Основниот кривичен суд во Скопје повеќе ги ценел олеснителните за сметка на отежнувачките околности. Како олеснителни се сметаат признавањето вина, изразеното каење и свеста за стореното, како и фактот што станува збор за млада личност која досега не била во судир со законот.
Отежнувачки околности, кои според обвинителот биле помалку ценети се начинот на сторување на делото, зачестеноста на овој вид кривични дела и особено фактот дека во несреќата е изгубен млад човечки живот. Дополнително, јавниот обвинител во жалбата навел дека оштетените со ништо не придонеле за да се случи сообраќајната несреќа и прописно ја поминувале улицата на обележан пешачки премин.
„Анализирајќи ја обжалената пресуда, сметам дека судот не ја одмерил адекватно казната, бидејќи ги применил одредбите за ублажување на казната, иако не постоеле законски услови за тоа“,
напишал обвинителот во жалбата.
Според обвинителот, висината на изречената казна (три години затвор) нема да ги постигне целите на казнувањето односно генерална и специјална превенција на овој вид кривични дела.
„Исто така, во жалбата се наведува дека и висината на изречената споредна казна – забрана за управување со моторно возило од Б категорија исто така е незадоволителна. Имајќи ги предвид околностите под кои е сторено делото и тешките последици, таа забрана треба да трае 5 години, колку што максимално дозволува материјалниот закон“,
велат од ОЈО Скопје.
Во сообраќајката, покрај младата Викторија која го загуби животот, беше повредено и младо момче кое со неа ја преминувало улицата на пешачки премин кај „Сити мол“.
Сообраќајката се случи на 20 јануари годинава и според обвинението, како и пресудата, возачот Ѓоргиев возел по булеварот „Партизански одреди“ и кога дошол до крстосницата со улиците „Московска“ и „Љубљанска“, каде што семафорот во тој момент бил исклучен и работел со трепкаво жолто светло, не обрнал внимание на пешаците кои преминувале на пешачки премин.
Тој возел со брзина од 67,3 километри на час, што е за 17,3 километри на час поголема од максимално дозволената, поради што не можел навремено да го запре возилото во случај на потреба.
Жалбата на пресудата беше најавена веднаш по изрекувањето на пресудата кога адвокатот на семејството на загинатата Викторија, рече дека се незадоволни од казната која ја сметаат еднаква на ослободителна пресуда.
И нејзините родители пред новинарите го изразија револтот од пресудата и рекоа дека се згрозени од одлуката на Основниот кривичен суд Скопје.
За утре пред Кривичен е најавен и протест под слоганот „Стоп на лошите пресуди и стоп на сообраќајното насилство“. Протестот на социјалните мрежи го најави партнерот на Викторија, Леонид Даов, кој бил со неа во моментот на сообраќајката и притоа се здоби со повреди.