Јордан Ѓорѓиев пред судијката Љубинка Бошевска изјави дека признава вина и многу се кае за стореното дело
Според обвинението, тој возел со брзина од 67,3 километри на час, што е 17,3 километри на час повеќе од пропишаната брзина
Обвинетиот Јордан Ѓорѓиев на денешното рочиште призна вина за сообраќајната несреќа кај „Сити мол“, во која загина 24-годишната Викторија Николова, а со телесни повреди се здоби нејзиниот партнер Леонид Даов.
Обвинетиот пред судијката Љубинка Бошевска изјави дека признава вина и многу се кае за стореното дело.
,,Се чувствувам виновен и многу се каам за стореното дело. Признанието го давам свесно, без никакви уцени и свесен сум за последиците од истото”,
изјави Ѓорѓиев.
Според обвинението, тој возел со брзина од 67,3 километри на час, што е 17,3 километри на час повеќе од пропишаната брзина.
Неговиот адвокат Душко Јанковиќ истакна дека бидејќи неговиот клиент признал вина нема да навлегува во материјалните докази, само ќе бара да се земат предвид и да се намали казната за стореното дело.
Адвокатот на покојната Николова, Владимир Михајловиќ, кажа дека нема да бара имотно-правни побарувања, додека адвокатката на оштетениот Леонид Даов, Билјана Андонова, рече дека ќе бара отштета.
,,Предјавувам имотно-правно побарување во име на оштетениот. Бараме од судот да го овозможи имотно- правното побарување во граѓански спор”,
изјави Андонова.
Јавниот обвинител и Андонова побараа казна со нула толеранција бидејќи, како што кажаа, несреќата се случила на пешачки премин.