Референтот во Агенцијата за вработување барал по 6 000 денари месечно од оштетениот за да не му го укине социјалниот надоместок и незаконски да ја евидентира неговата сопруга како активен барател на работа
Основното јавно обвинителство Прилеп отвори истрага против виш референт во локалниот Центар за вработување поради основано сомнение за кривично дело примање поткуп, а поради тежината на делото и околностите, надлежниот јавен обвинител веќе доставил предлог до Основниот суд во Прилеп за определување мерка притвор за осомниченото службено лице.
Во соопштението на Обвинителството се вели оти во периодот од 23 април до 24 јули годинава, службеникот изнудил вкупно 18 000 денари од жител на селото Бело Поле, а проблемот настанал откако оштетениот и неговата сопруга, кои биле корисници на социјална помош, добиле СМС покана од Агенцијата за да се јават на обука за работа.
Осомничениот ја искористил ситуацијата и почнал да го уценува граѓанинот, заканувајќи му се дека доколку ја одбие обуката ќе остане без социјалната помош. За да спречи такво нешто, референтот побарал секој месец да му се исплаќа половина од државниот надоместок, односно по 6 000 денари.
„Исто така осомничениот му ветил дека ќе ја евидентира неговата сопруга во електронскиот систем на Агенцијата како активен барател на работа, иако таа немала контролен картон и не го доставувала во Центарот на увид“,
велат од Обвинителството.
Оштетениот веднаш започнал со исплатата, носејќи 4 000, па 2 000 денари директно во канцеларијата на вработениот и продолжил месечно да врши уплати. При предавањето на последниот износ од 6 000 денари во текот на вчерашниот ден, полициски службеници ги пронашле и одзеле банкнотите од осомничениот, по што тој веднаш бил приведен.