Основното јавно обвинителство Скопје оформи предмет за случајот со измамата во кој повеќе граѓани плаќале капар за еден ист стан.
Агент за недвижности зел капар од тројца различни купувачи за еден ист стан, со што тројцата ги оштетил за вкупна сума од 11 илјади евра. Според договорите за капар до кои дојде МИА, склучени помеѓу купувачите и агентот, воочливо е дека за еден ист стан тројца граѓани платиле капар од 5 500, 4 500 и 1 000 евра. Со капар од по 8 000 и 5 000 евра, за станови од истата зграда, се оштетени и други двајца купувачи, кои се обидуваат да си купат стан уште од минатата есен. Со 8 000 евра е оштетен и уште еден купувач кој дознава дека е измамен во март оваа година.
Од ОЈО за МИА денеска известија дека пристигнало известувањето од Министерството за внатрешни работи.
„Оформен е предмет, кој е распределен кај надлежен јавен обвинител кој ќе постапува. Јавниот обвинител ќе ги испита и оштетените и пријавениот, а ќе ги обезбеди и сите материјални докази за утврдување на фактите и проверка на наводите“,
велат од ОЈО.
Предметот е оформен две недели по пријавувањето на случајот за кој пишуваше МИА, а во кој шестмина граѓани товарат агент за недвижности за измама според членот 247 од Кривичниот законик.
Покрај тоа што биле измамени за капар од 10 илјади евра, МИА откри дека двајца од купувачите платиле и данок за промет на недвижности за истиот стан, секој засебно, во вкупен износ од близу три илјади евра. Да плати данок за истиот стан тргнал и третиот оштетен, кој навреме дознал за измамата и веднаш ја повлекол пријавата за утврдување данок на промет на недвижности поднесена до Град Скопје.
Од Град Скопје велат дека поради тоа што случајот е во истражна постапка сите дополнителни информации се во тајност.
Поради пресумпција на невиност и заштита на лични податоци, од приказната беа изоставени идентитетите.