Основното јавно обвинителство Прилеп поднесе предлози за издавање казни во висина од три илјади евра за едно лице за неспроведување задолжителна самоизолација и казна од две илјади евра за друго лице што го прекршило полицискиот час.
„Првиот обвинет на 17 март пристигнал од Србија, земја со среден ризик за ширење на ковид-19. При влез во државата, потпишал изјава дека ќе спроведе самоизолација во период од 14 дена во неговиот дом, согласно мерките и препораките за спречување на ширењето на заразната болест. Но, при извршена контрола од страна на полициски службеници, обвинетиот не бил затекнат во неговиот дом“,
соопштија од ОЈО.
За него се бара парична казна во висина од 100 дневни глоби, секоја од нив во висина од по 30 евра во денарска противвредност.
„Второто обвинето лице не се придржувало на здравствените прописи, односно Одлуката за забрана и посебен режим на движење на територијата на Република Северна Македонија. Обвинетата на 25.3.2020 година, се движела низ градот со што го прекршила полицискиот час и го сторила кривичното дело кое ѝ се става на товар“,
стои во соопштението од ОЈО.
За обвинетата е побарана парична казна во висина од 100 дневни глоби, секоја од нив во висина од по 20 евра во денарска противвредност.
Двете дела се казниви по член 206 од КЗ за непостапување според здравствените прописи за време на епидемија.