Основното јавно обвинителство за гонење организиран криминал и корупција до Судот поднесе предлог-обвинение со барање за притвор на шверцерот на 40 мигранти чие возило беше фатено кај штипското село Лакавица на крајот на февруари, со кое осомничениот ги превезувал мигрантите, неколку дена претходно било пријавено за украдено.
„Обвинетиот, на 26.2.2020 година, на претходно договорено место во близина на македонско-грчката граница, прифатил 36 мигранти од Авганистан и четири мигранти од Пакистан. Мигрантите ги сместил во товарно моторно возило ‘пежо’ и ги превезувал кон Куманово по меѓународниот пат А-2 во правец од Радовиш кон Штип. Кај Неготино возилото било забележано од полициските службеници кои со светлосен сигнал му дале знак да запре, но обвинетиот продолжил да се движи кон Штип, а полициските службеници тргнале по него. Кај с. Лакавица обвинетиот го запрел возилото и бил лишен од слобода“,
соопшти Јавното обвинителство.
И покрај тоа што целосно е забранет нелегален влез и превоз на мигранти во Македонија, шверцот сепак е присутен. Обидите за шверцување во земјава зачестија, особено откако Турција ја крена рампата за нивен трансфер кон Грција и Бугарија.
Само изминатиов викенд полицијата фатила околу 180 мигранти во обид за нелегално влегување во земјава и ги вратила назад во Грција.