Скопското обвинителство денеска побара Основниот кривичен суд да изрече парични казни на пет лица зашто не ја почитувале наредбата за изолација.
Обвинителството бара секој од нив да плати по 100 глоби од 20 евра или по 2 000 евра.
Станува збор за лица кои изминатите денови пристигнале во земјава од државите кои се со висок или среден ризик од коронавирус и секој од нив потпишал изјава и прифатил дека ќе се стави во изолација во сопствениот дом во период од 14 дена. Но, при проверката, полицајците не ги пронашле во домовите .
Основното јавно обвинителство Скопје денеска до Основниот кривичен суд Скопје поднесе предлози за издавање казнени налози против пет лица, сите за кривично дело – Непостапување според здравствените прописи за време на епидемија од член 206 став 1 од Кривичниот законик.
Имено, по пристигнување од земји со висок и среден ризик на 16, 17 и 18 март, секој од обвинетите потпишал изјава со која прифатил да се самоизолира во својот дом во период од 14 дена. Но, при проверките направени на 18 и 19 март, од страна на овластени службени лица, не биле затекнати на наведените адреси.
Обвинетите, иако должни да ги имплементираат мерките определени во Писмена наредба на Министерството за здравство за сузбивање или спречување на епидемијата на коронавирусот – ковид-19, како и обврската од потпишаните изјави за самоизолација, не постапиле согласно предвиденото, со што го сториле кривичното дело.
Јавните обвинители кои постапуваат во предметите за сите обвинети лица на Судот му предложија да изрече парични казни во висина од 100 дневни глоби, при што висината на една дневна глоба да биде одредена во износ од по 20 евра во денарска противвредност.
Покрај во Скопје, и обвинителството во Охрид попладнево побара казна за македонска државјанка со живеалиште во Швајцарија. За неа, се бара казна од 3 000 евра, поради истите причини. Таа на 9 март влегла во земјава, на 18 март, пак, дала изјава дека ќе седи во изолација, но уште истиот ден таа ја прекршила мерката и излегла надвор.