Врз основа на две кривични пријави за издадени 219 пасоши со идентитет на наши државјани од дијаспората, ОЈО бара притвор за осум лица, од кои едно едно е во бегство, додека за две – мерки на претпазливост
Вакви пасоши со украден идентитет добиле 215 странски државјани, а на едно лице му биле издадени 4 пасоши со различни идентитети
Министерството за внатрешни работи до Основното јавно обвинителство Скопје денеска поднесе две кривични пријави – едната од Единицата за финансиски криминал при Одделот за сузбивање организиран и сериозен криминал-Сектор за криминалистички истраги и втората од Одделот за внатрешна контрола, криминалистички истраги и професионални стандарди, за 11 лица за издавањето пасоши со украден идентитет. Тие се товарат кривично дело – злоупотреба на службена положба и овластување од член 353 став 1 од Кривичниот законик.
Како што објави ОЈО, 10 од осомничените се вработени во МВР во службите за издавање пасоши, додека едно лице, (како поттикнувач) е посредник за издавање 219 вакви пасоши.
Првата кривична пријава се однесува на 215 незаконски издадени патни исправи на странски државјани под туѓ, македонски идентитет, а со фотографија од лицето на кое му била издадена патната исправа. Идентитетот што се користел бил на лица што живеат во дијаспората.
Втората пријава, пак, се однесува на 4 пасоши што му биле издадени на едно лице, при што биле искористени повеќе матични броеви, кои не биле опфатени со постапка за нивно поништување, со кои тоа лице добивало нов идентитет, но со негова фотографија.
Обвинителството за осум од осомничените, од кои едно е недостапно, бара притвор, додека за две лица мерки на претпазливост – забрана за напуштање на живеалиште, обврска повремено да се јавуваат кај определено службено лице, привремено одземање на патната исправа и забрана за преземање определени работни активности поврзани со кривичното дело.
Еден од осомничените веќе се наоѓа во притвор по претходен предмет за незаконско издавање возачки дозволи.
Од Обвинителството ја потврдуваат информацијата што вчера ја објави и МВР дека истрагата за овој предмет траела повеќе од една година, поради обемноста на доказниот материјал и потребата од меѓународна соработка на МВР за прибирање на доказите.
Обвинителството, исто така, најави дека ќе ги истражи информациите дали и кои лица им ги направиле достапни на јавноста информациите за истрагата пред да бидат поднесени кривични пријави. Последното се однесува на барањето од министерот за внатрешни работи Оливер Спасовски, кој на вчерашната прес-конференција го повика Обвинителството да истражи како информациите за оваа меѓународна акција стигнале до опозициската ВМРО-ДПМНЕ, која прво на брифинг, а потоа и вчера на прес-конференција на лидерот Христијан Мицкоски објави документи за два такви пасоши кои со туѓ идентитет биле издадени на лица од подземјето во Србија и Турција.
Чулев тврди дека му оставил на Спасовски комплетирана истрага за фалсификуваните пасоши
Министерот за внатрешни работи Оливер Спасовски во гостувањето на „Утрински брифинг“ рече дека еден од уапсените во аферата со издавањето пасоши на криминалци бил во секојдневен контакт со лидерот на ВМРО-ДПМНЕ, Христијан Мицкоски.
ВМРО-ДПМНЕ возвраќа: Единствениот со кој Мицкоски контактирал, а можеби е поврзан со пасошите е Заев
Потпретседателот на ВМРО-ДПМНЕ, Александар Николоски, денеска на прес-конференција објави нови информации со кои располага партијата во врска со аферата за издавање македонски пасоши на осомничени криминалци од странство. Според тоа што го тврди тој, со пасоши се стекнале и водач на наркокартел од Албанија и платеник на Ковачкиот клан кој извршил обид за убиство во Украина.