Претходно Бејта, во емисијата на Алсат ТВ, го обвини претседателот на Собранието Талат Џафери дека коалицирал со претседателот на Алијанса за Албанците и актуелен градоначалник на Гостивар, Арбен Таравари на локалните избори во 2021 година
Поранешниот градоначалник на Гостивар, Невзат Бејта, кој е дел од т.н. „огнена група“ во емисијата „Програма 200“ на Алсат ТВ, го спореди првиот вицепремиер Артан Груби, чија смена ја бараат, со тенекија.
Претходно Бејта го обвини претседателот на Собранието Талат Џафери дека коалицирал со лидерот на Алијанса за Албанците и актуелен градоначалник на Гостивар, Арбен Таравари на локалните избори во 2021 година.
„Што се однесува до соработката со Арбен Таравари, таа соработка постои уште од 2017 година. Стануваше збор за тајна соработка. Координатор беше Талат Џафери. Причина беше тоа што ние излеговме, тие се мобилизираа и создадоа свои структури за да ме елиминираат мене од Гостивар и му помогнаа на Арбен Таравари. Беа во коалиција“,
рече Бејта во емисијата.
Потоа ексградоначалникот на Гостивар, одговарајќи на прашање со колку карати може да се измери Груби, изрече повеќе навреди за првиот вицепремиер.
„Артан Груби не е од металите кои се мерат со карати, туку е метал кој нема карати, бидејќи ако имаше карати ќе беше добро. Тогаш немаше да прави раскол во ДУИ. Тие што немаат карати се железо, тенекија. Металите кои имаат карати се добри метали и вредни, луѓето ги сакаат, но и луѓето врз основа на добрите работи кои ги прават се мерат во карати. Ако сплотуваат и ако не прават елиминирање на членството. Но, тие им се закануваат на членовите бидејќи ја имаат власта, но членовите не се плашат“,
рече Бејта во емисијата на Алсат.
Првиот вицепремиер Артан Груби кој вечерва заедно со лидерот на ДУИ, Али Ахмети и други партиски соработници беше на средби со сопартијци и граѓани во Гостиварско, прашан за коментар во врска со навредите од Бејта, за весникот Лајм изјави дека ексградоначалникот на Гостивар му е сопартиец и му посака се најдобро и добро здравје.
„Бејта ми е сопартиец. Нему и на неговото семејство му посакувам се најдобро и добро здравје“,
рече Груби во видео-изјава за весникот ЛАЈМ.