Одбраната мора да ги добие сите докази што се наоѓаат на списокот на Јавното обвинителство, во иста форма како што ги доставил јавниот обвинител, побара еден од бранителите, кој дополни дека одбраната бара да ѝ се овозможи, како што рече, „елементарното право за подготовка на одбраната со одложување на ова рочиште“. Следното рочиште е закажано за 13 јуни
Судењето против Жан Митрев, во Основниот кривичен суд Скопје, денеска повторно се одложи.
Одбраната на Жан Митрев на денешното рочиште побара одложување на судењето поради тоа што не им биле доставени сите докази од списокот на докази од Јавното обвинителство и побара дополнителен рок од 20 работни дена за да извршат увид во доказите и 10 работни дена за подготвување на одбраната.
Одбраната мора да ги добие сите докази што се наоѓаат на списокот на Јавното обвинителство, во иста форма како што ги доставил јавниот обвинител, побара еден од бранителите, кој дополни дека одбраната бара да ѝ се овозможи, како што рече, „елементарното право за подготовка на одбраната со одложување на ова рочиште“.
По долга дискусија, јавниот обвинител не го оспори барањето, а судот го прифати барањето.
Следното рочиште е закажано за 13 јуни.
По одложување на рочиштето и по напуштањето на судската зграда, Жан Митрев беше испратен со голем аплауз од насобраните граѓани кои од утрово беа таму за да му дадат поддршка на докторот. Граѓаните кои беа дел од собирот и велат дека се поранешни пациенти, со аплауз и го пречекаа Митрев кога дојде во Кривичниот суд.
Адвокатот на Жан Митрев, Никола Додевски, кога излезе од судската зграда и кога го слушна аплаузот, пред новинарите рече дека после тоа не треба да се дава изјава затоа што тој аплауз е вистинската слика за Жан Митрев.
„Прво да заврши аплаузот, ова е вистинската слика за д-р Жан Митрев и не можеме да ја прекинеме, тоа е Жан Митрев. Треба изјава после ова или доволно е?“,
кажа Додевски.
Но, сепак, поради тоа што новинарите веќе биле таму, Додевски реши да даде изјава.
„Понекогаш и покрај тешка битка, одбраната во Македонија успева да ги извојува своите права. За жал, тоа е трошење енергија за нешто што законот го гарантира со конвенцијата за човекови права. Неколку часа ни требаше да го убедиме судот, еве конечно и јавниот обвинител не се спротивстави, да ни одобри да го проучиме предметот доволно време за да подготвиме одбрана. На друго место тоа се добива со обичен поднесок. За жал, ние се бориме и биеме битка да ги добиеме тие права. Но, како и да е, малку е, но колку-толку. За нашиве судови и тоа е доволно. Одбраната за ваков предмет бара 30 работни дена, а добива 15 дена. Тоа е нашето правосудство. Но и за 15 дена ќе се обидеме да завршиме, да го подготвиме Жан. Ја подготвуваме вистината“,
рече адвокатот Додевски, дел од адвокатскиот тим кој потоа заедно со Жан Митрев се пробиваше меѓу насобраните граѓани.
Обвинителката Искра Хаџи-Василева, која го гони Жан Митрев за измама, се надева оти следното судење ќе се одржи откако и денешното повторно се одложи. Според неа, адвокатите на Митрев ги имаат сите докази.
„Нема што многу да се каже. И денеска се одложи. Се надевам дека наредното, конечно, ќе го почнеме за да се соочиме во судница, како што е редот и каде што единствено може да ги изнесеме фактите и доказите. Обвинителството останува на поднесеното обвинение, уверени сме во силината на доказите кои ќе ги изнесеме пред судот. Веројатно овој обид за одбегнување почнување на расправата е страв од доказите“,
рече Искра Хаџи-Василева додавајќи дека невистини се информациите околу бројот на страни и докази за кои адвокатите велат дека се многу и кои требало да ги разгледаат за кратко време.
Обвинението против Митрев се однесува на прикривање клучни факти за хемофилтрацијата – метод кој бил прикажуван дека е алтернатива за лекување ковид-пациенти, иако не смеел да го прави тоа.
Кога го поднесоа обвинението, од Основното јавно обвинителство (ОЈО) Скопје појаснија дека хемофилтрацијата како метод може да најде примена и во третирањето на ковид-пациенти, но оти таа е ограничена, кај најтешки пациенти со тешка клиничка слика. Она што го потенцираа е дека во обвинението не станува збор за тоа дека пациенти во клиниката „Жан Митрев“ починале од хемофилтрација и несовесно лекување, туку дека на пациентите и нивните роднини не им била прикажана целосната слика за методот и биле доведе во заблуда.
Предметот во обвинителството беше отворен по документарниот филм „Нечиста крв“ на Истражувачката репортерска лабораторија (ИРЛ) емитуван во јули 2022 година. По спроведена истрага, обвинение беше поднесено на 10 јануари годинава, а по прифаќањето следуваше и закажувањето на првото судско рочиште.
Докторот Жан Митрев, пак, во своите јавни настапи, како и во неколкуте соопштенија испратени до медиумите тврдеше дека не измамил пациенти, како и дека ова е хајка против него.
Процесот го води судијката Лидија Петровска, а застапник на обвинението е обвинителката Искра Хаџи Василева.