Во вторник се очекува и одлука дали и за кога ќе се пролонгира Европското првенство кое треба да се одржи во јуни годинава
УЕФА ги откажа сите натпревари од евротурнирите следната недела. Во списокот се вклучени осминафиналните натпревари во Лигата на шампионите и Лигата на Европа, како и натпреварите за младинска лига на УЕФА. Одложена е и ждрепката за четврт-финалето на двата турнира, закажани за петок, 20 март.
„Со оглед на случувањата во врска со ширењето на ковид-19 во Европа и сродните одлуки од различни влади, сите натпревари организирани од УЕФА и закажани за следната недела се одложуваат“,
пишува во соопштението на европската фудбалска организација.
Во вторник на 17 март се очекува одлука за тоа како да се продолжи до крајот на сезоната. Тогаш УЕФА ги покани претставниците на сите 55 членки, заедно со раководството на Европската клупска асоцијација и европските првенства и претставник на ФИФПРО на видеоконференција.
На состанокот се очекува да се донесе одлука кога ќе се доигруваат националните првенства, натпреварите и европските клупски турнири, како и да се донесе одлука за одложување на почетокот на Европското првенство, кое беше предвидено да стартува на 12 јуни.
Од вестите во спортот, а поврзани со коронавирусот, денеска стигна и информацијата дека фудбалерот на Челзи, Калум Хадсон-Одои, се излечил од вирусот.
Тој беше првиот играч на англиското првенство кому му беше дијагностициран коронавирус.
„Како што можеби сте слушнале, неодамна бев третиран за вирусно заболување. Изолиран сум околу една недела и веќе сум здрав, затоа се надевам дека наскоро ќе се вратам на теренот и ќе ве видам повторно“,
сподели тој преку видеопорака на социјалните мрежи.
Со коронавирус е заразен и менаџерот на Арсенал, Микаел Артета. Ова беше соопштено по резултатите од тестовите извршени вчера, објави клубот. Веднаш беше донесена одлука за затворање на лондонската клупска база. Сите луѓе што имаат каков било контакт со менаџер на „топчиите“ се во карантин, односно апсолутно сите играчи и тренерскиот персонал на англиската екипа.
Инаку, и во англиските првенства се откажаа сите натпревари до 3 април.