360 степени вечерва објави анализа на договорот за надозорот над изградбата на дел од коридорите 8 и 10-д, задача која и е доверена на американско-турската компанија „Бехтел и Енка“. Документите покажуваат дека ќе бидат исплатени високи суми за ангажманот на експерти и дека иако надзорот е преставен како странски сепак домашни експерти и фирми ќе го имаат главниот збор. Поконкретно, најголем удел во работите на терен а и трошоците, ќе одат преку домашната компанија „Електра солушнс“.
„360 степени“ упати неколку прашања до компанијата, на што добивме одговори и делови од нив се објавени во анализата. Подолу во овој текст ги објавувуваме сите прашања и одговорите во целост.
360 степени: Во одговор до 360 степени, од Министерството за транспорт и врски тврдат дека сте побарале лиценца за надзор на 27 септември 2022 година, а сте ја добиле истата за помалку од пет работни дена, на 3 октомври 2022 година. Како воопшто станавте дел од конзоциумот кога, како компанија, воопшто не сте исполнувале услови во моментот кога огласот бил отворен/распишан?
Електра солушнс: Во периодот од објавувањето на новата постапка за доделување на договорот за надзор (15.09.2022 година), веднаш бевме контактирани од 4 странски компании за заедничко учество на ново распишаниот тендер, поради што и се одлучивме да пристапиме кон обезбедување на потребната документација за евентуално наше здружување со некоја од нив и учество во тендерот во форма на конзорицум. Одлучивме да учествуваме на тендерот заедно со ИРД Инженеринг од Рим, Италија, а Договорот за конзорциум со ИРД Инженеринг го потпишавме на 05.10.2022 година (по добивање на Лиценцата А за надзор). Би сакале да напоменеме дека ЕЛЕКТРА СОЛУШНС ДООЕЛ Скопје не е новоформирана фирма за потребите на тендерот, туку дека е основана на 25.10.2002 година и успешно работи веќе 21 година. Лиценцата за надзор е извадена уредно, навремено и според сите законски прописи.
360 степени: Според објавениот договор, најголем дел од работите на предметниот надзор (а со тоа и обрт/трошоци) одат директно преку Електра солушн или преку подизведувачите со кои сте потпишале договори. Како е можно компанијата со најмалку искуство во дејноста во овој конзорциум да добие најголем дел од работите?
Електра солушнс: Неточна е констатацијата дека ЕЛЕКТРА СОЛУШНС е компанија со најмалку искуство (како што напоменавме во одговорот на претходното прашање), би повториле дека истата постои повеќе од 21 година и досега има учествувано на домашни и меѓународни тендери и успешно, квалитетно и навремено реализирала бројни договори за јавни набавки. Во однос на обврските и уделите на секој од членовите на конзорциумот и подизведувачите, сакаме да укажеме дека нашето учество во уделот на конзорциумот е 30,81%. ЕЛЕКТРА СОЛУШНС има склучено Договори со фирми подизведувачи, а воедно од вкупно барани 90 позиции за експертски персонал во тендерската документација, има обезбедено, ангажирано, вработено и склучено Договори со 44 домашни физички лица – експерти како стручен персонал со долгогодишно искуство соодветно на бараните услови во тендерската документација. Со склучените Договори обезбедивме 100% ангажман на домашни експерти кои ќе стекнат референци и надомест за нивниот ангажман во овој голем проект кој е на ниво на европските земји за ваква категорија на проекти.
360 степени: Фирмата Институт за патишта, која беше избрана во првиот конзорциум за надзор над „Бехтел и Енка“, е во тесна семејна поврзаност со Електра Солушнс. Кој е вашиот став за обвинувањата, пред се од опозиската ВМРО-ДПМНЕ, дека фирмите на вашето семејство од некоја причина морале да бидат дел од добитната комбинација?
Електра солушнс: Во изминатиов период во медиумите и порталите, се изнесени премногу невистини и лаги, за нашите семејни компании, а особено за ЕЛЕКТРА СОЛУШНС која е основана во 2002 година. Би сакале да напоменеме дека Институт за патишта ДООЕЛ Велес е сопственост на Сотир Ампов – Јуниор, а ЕЛЕКТРА СОЛУШНС ДООЕЛ Скопје е сопственост на неговиот брат Андон Ампов. Компаниите имаат седиште во Велес и Скопје и имајќи ги во предвид одредбите на Законот за јавните набавки каде е наведено дека било кој економски оператор може да учествува на постапките за јавни набавки самостојно или како член во понуда од група на понудувачи и согласно истото не постои законска пречка ниту прекршување на било кој Закон.
Би сакале да додадеме дека за првиот тендер кој се поништи, Институт за патишта како член на конзорциумот со ИГХ АД Загреб, имаше склучено Договори со фирми подизведувачи, а воедно од вкупно барани тогаш, 120 позиции за експертски персонал во тендерската документација, обезбеди, ангажира, вработи и склучи Договори со 70 домашни физички лица – експерти како и стручен персонал соодветно на бараните услови во тендерската документација.
Институт за патишта беше член на конзорциумот со ИГХ АД Загреб, чија понуда беше избрана за најповолна понуда на првиот тендер. Истиот се поништи поради ненавремено обезбедена банкарска гаранција од носителот на групата ИГХ АД Загреб, која беше негова обврска согласно меѓусебниот конзорциумски договор. Договорот за надзор беше раскинат, што на Институт за патишта како компанија им нанесе сериозна штета и изгубена корист, а со издавањето на негативна референца (забрана за учество во постапки за јавни набавки во период од 6 месеци), сериозно се наруши угледот и кредибилитетот на Институт за патишта како компанија која врши надзор над изградба на објекти од прва категорија. Институт за патишта е домашна компанија и целосно ги отфрламе наводите за било каков руски капитал во истата.
Во соработка со ИРД Инженеринг, ние како Електра Солушнс, како нивен нов локален партнер за потребите на вториот тендер, го превземавме потребниот експертски персонал и ги обезбедивме сите потребни документи согласно барањата и условите на тендерот. Тврдиме дека како компанија располагаме со потребниот кадар и стручен персонал, капацитети и ресурси заради кои спремивме квалитетна, целосна и соодветна понуда, со која бевме избрани за доделување на договорот за надзор. Конзорциумот за својата професионалност, стручност и квалитет во вршењето на надзорот гарантира со Банкарска гаранција за квалитетно и навремено извршување во висина од 2,6 милиони евра.
Било какви други констатации, дезинформации, невистини и лаги со индигнација ги отфрламе како апсолутни невистини.
360 степени: Опозицијата ве обвинува и за блискост со премиерот Димитар Ковачевски и неговиот прв заменик, Артан Груби. Кој е вашиот став за тие обвинувања?
Електра солушнс: Никој од нашето потесно и пошироко семејство како сопственици на семејни фирми, нема ниту една партиска определба досега, бидејќи тоа ни е семеен деловен принцип и правило од 1991 година до денес. Отфрламе било каква поврзаност, познанство или блискост со наведените лицa.