На седницата, како што се наведува во соопштението, присутни биле шест градоначалници на општините под надлежност на град Скопје – Сарај, Карпош, Чаир, Кисела Вода, Аеродром и Центар. Според ова, за мерките и решенијата за намалување на загадувањето со Арсовска не дошле да дискутираат градоначалниците на Бутел, Гази Баба, Ѓорче Петров и Шуто Оризари
Координирана акција за справување со загадувањето, институционално постапување за интегрираните еколошки дозволи, чистење на дивите депонии, заедничко постапување за справување со комуналните проблеми и нови мерки за ограничување на тешките товарни возила низ општините. Ова биле темите на кои денеска разговарале градоначалниците на скопските општини со градоначалничката на Градот Скопје, Данела Арсовска, на првиот одржан состанок на Координативното тело на градоначалници на Град Скопје во 2023 година.
„Денеска заседаваше Координативното тело на градоначалници на Градот Скопје, со главна цел конкретни решенија за предизвиците со кои се соочени општините. Изготвен е акциски план, се започнува со реализација, а со секоја координација ќе се надополнува планот соодветно на состојбата на терен. Неопходно е да соработуваме сите за да имаме побрзи решенија за кои е неопходна координација и заеднички активности. Само со меѓусебна соработка ќе постигнеме брзи решенија”,
истакнала на средбата градоначалничката Данела Арсовска, се наведува во соопштението за состанокот.
Координативното тело на градоначалници под Градот Скопје согласно Закон, како што потсетуваат од Град Скопје, дејствува во интерес на граѓаните, а на седниците се разгледуваат прашања од заеднички интерес на општините под градот Скопје за изнаоѓање навремени и ефикасни решенија.
Сепак, на состанокот на Координативното тело не биле присутни градоначалниците од сите 10 скопски општини.
На седницата, како што се наведува во соопштението, присутни биле шест градоначалници на општините под надлежност на град Скопје – Сарај, Карпош, Чаир, Кисела Вода, Аеродром и Центар.
Според ова, за мерките и решенијата за намалување на загадувањето со Арсовска не дошле да дискутираат градоначалниците на Бутел, Гази Баба, Ѓорче Петров и Шуто Оризари.
На чело на три од овие четири општини, конкретно на Гази Баба, Бутел и Ѓорче Петров се градоначалници од редовите на ВМРО-ДПМНЕ, додека градоначалникот на Шуто Оризари е поддржан од ЛДП и ДОМ.