На координативниот состанок на премиерот Христијан Мицкоски со министерот за економија и со директорот на ДПИ, како што се наведува во владиното соопштение, се разговарало за досега преземените постапки од надлежните институции и опсежната анализа за сите субјекти регистрирани како кабаре или дискотеки, ноќни клубови…
Од утре започнува теренска контрола на сите субјекти во државата регистрирани како кабареа, дискотеки или ноќни клубови, најави Владата по денешниот координативен состанок на премиерот Христијан Мицкоски со министерот за економија Бесар Дурмиши и директорот на Државниот пазарен инспекторат, Влатко Стојаноски.
На координативниот состанок на премиерот со Дурмиши и Стојаноски, како што се наведува во владиното соопштение, се разговарало за досега преземените постапки од надлежните институции и опсежната анализа за сите субјекти регистрирани како кабаре или дискотеки, ноќни клубови…
По трагедијата во дискотеката во Кочани во која загинаа 59 млади лица, Владата на вчерашната седница донесе одлука со која го задолжи Државниот пазарен инспекторат (ДПИ) во наредните три дена да изврши вонреден инспекциски надзор врз угостителски објекти – кабареа, ноќни клубови, дискотеки и дискотеки на отворено на територија на целата држава. За наодите од надзорот, ДПИ мора веднаш да ја извести Владата за да се утврди дали овие субјекти работат согласно стандардите и законот.
Премиерот Мицкоски вчера на прес-конференција обелодени дека лиценцата за работа на дискотеката „Пулс“ во Кочани е фалсификувана и издадена на 13 март 2024 година, со важност од една година, а оти на неа стои потписот на тогашната државна секретарка во Министерството за економија, Размена Чекиќ-Дуровиќ. Министер во тоа време е Крешник Бектеши, кадар на ДУИ.