Во однос на обезбедувањето двотретинско мнозинство во процесот на уставни измени, пратеничката вели дека процесот секако ќе почне, а од индивидуалната волја на пратениците ќе зависи дали и како тој ќе заврши
Дали Либерално-демократската партија ќе го поддржи Алијанса за Албанците да влезе во владината коалиција, ќе зависи од програмските цели, вели пратеничката и претседателка на оваа партија Моника Зајкова по вчерашната средба со премиерот и лидер на СДСМ, Димитар Ковачевски, со коалициските партнери.
„За нас, сè што значи движење на брзиот воз на Европската Унија и европска агенда, ние даваме поддршка, меѓутоа кога влегувате во една коалиција мора да знаеме кои ќе бидат програмските цели на таа коалиција, за што таа коалиција ќе се залага и која е целта… Досега јас не сум слушала ниту една партија да се огради дека не е за тоа и сите имаме иста цел, но имаме различни гледишта во поглед на решенијата и одлуките како да се стигне до таа цел. За ЛДП секогаш ќе биде важно какви идеали ќе дели таа коалиција и која програма ќе се застапува и од тоа ќе зависи дали ќе даде поддршка или не“,
вели Зајкова.
Во однос на обезбедувањето двотретинско мнозинство во процесот на уставни измени, пратеничката вели дека процесот секако ќе почне, а од индивидуалната волја на пратениците ќе зависи дали и како тој ќе заврши.
„За уставните измени процесот треба да започне и секој пратеник индивидуално одлучува за тоа каква одлука ќе носи понатаму врз основа на својата визија за иднината и развојот на државата и говоревме дека пратениците не треба да бидат предмет на никакви пазарења или притисоци, како што сме сведочеле во минатото“,
вели Зајкова.
Покрај за окрупнување на мнозинството и уставните измени, на синоќешната средба се зборувало и за економската и енергетската криза, за тоа колку од владината програма е реализирано и што останува. Тоа, наведе лидерката на ЛДП, била само една од редовните средби што владината коалиција и партнерите го прават меѓусебно.
Уште еден коалициски партнер, Павле Трајанов, зборуваше за средбата и неговите ставови за евентуален влез на Алијанса за Албанците во владината коалиција, при што тој постави услов дека ќе поддржи такво нешто доколку не се почитува правичната застапеност на сите етнички заедници согласно Уставот и амандманот 6. Според неговата изјава, не може во владата треба да има пет до шест министерски места за албанските партии, а ДУИ, смета Трајанов, е таа што треба да отстапи место за Алијанса.
„Значи соодветна и правична застапеност на сите етнички заедници во власта и во другите институции. За тој принцип јас се залагам. И доколку така се компонира новата влада или реконструирана влада ќе поддржам. Во спротивно не сме подготвени како партија да прифатиме уцени. Таа партија што има проблеми со парламентарната група треба да ја плати цената. Сега ДУИ има шест министерски места. Ако сакаат нов партнер, тогаш треба да отстапи две места. Тоа би било во ред. Но генерално мислам дека соодветната застапеност значи некаде пет до шест министерски места. Бидејќи така сме поделени, така е конципирано во Уставот за соодветна застапеност на етничките заедници така треба и тоа да се спроведува во пракса“,
изјави синоќа Трајанов.
Премиерот Ковачевски, пак, по синоќешната средба во Клубот на пратеници се огласи само на социјалните мрежи, велејќи дека се разговарало за актуелните политики, кризата, плановите за 2023 година.
„Работна вечера со претседателите и други високи претставници на парламентарните партии со кои СДСМ заедно настапи на последните парламентарни избори и кои се дел од владината коалиција. Во пријатна атмосфера разговаравме за активностите во претстојната 2023 година, за мерките и политиките на Владата за справување со глобалната енергетска криза, економскиот развој и енергетската транзиција, за имплементација на владината програма, реформите за европскиот пат и чекорите за обезбедување европска иднина на државата“,
наведе Ковачевски.