Лидерот на ДС, Павле Трајанов, пред состанокот рече дека реконструкција на Влада ќе поддржат доколку се почитува амандманот 6 од Уставот
Во седиштето на владејачката СДСМ се одржа средба со коалициските партнери на која се разговара за евентуално проширување на владината коалиција. Разговорите ги води генералниот секретар на СДСМ Миле Зечивеќ, а меѓу присутните се и лидерите на НСДП, ДОМ и на Демократски сојуз, Горан Мисовски, Маја Морачанин и Павле Трајанов.
На средбата не присуствува премиерот Димитар Ковачевски, кој беше на седница на Советот за безбедност во Кабинетот на претседателот Стево Пендaровски. Коалициските партнери подоцна во Клубот на пратеници ќе се сретнат на вечера со Ковачевски.
Пред состанокот на Бихаќка, претседателката на ДОМ Маја Морачаин, изјави дека досега немале никаков разговор, ниту некои конкретни информации, освен она што било споделувано во медиумите.
„Сакам прво да ги слушнам информациите, што се планира, која е целта на евентуално зголемување на мнозинството, што тоа ќе значи и во однос на програмата и во однос на кадровските решенија, и се разбира она што е важно за ДОМ, ние сакаме да ги наметнеме прашањата и темите коишто се важни за нас да бидат реализирани“,
изјави Морачанин.
Лидерот на ДС, Павле Трајанов рече дека реконструкција на Влада ќе поддржат доколку се почитува амандманот 6 од Уставот.
„Ставот на ДС, и мојот став како претседател на партија е јасен. Влада, реконструкција на Влада ќе поддржиме доколку се почитува амандман 6 од Уставот. Тоа е соодветна и правична застапеност на сите етнички заедници во власта и во другите институции. Доколку се отстапува од тоа начело, тогаш нема да поддржиме реконструкција на Владата“,
изјави Трајанов.
Ковачевски денеска порано во изјава за новинарите рече дека разговарал и оти и денеска ќе разговара со добар дел од коалициските партнери во однос на, како што вели, темите што се значајни за работењето на Владата, а се од интерес за граѓаните, како што е продолжувањето на европскиот пат на земјата.
Централното претседателство на Алијанса за Албанците неделава ќе формира комисија која треба да преговара за евентуален влез на партијата во Владата или за останување во опозиција, откако Централното собрание викендов го овласти раководството да ја донесе конечната одлука.
Во саботата вечер, по завршувањето на Централното собрание на Алијанса за Албанците, претседателот на партијата Арбен Таравари, рече дека имале плодна дискусија на оваа тема, оти дел од членовите биле за, некои против, како и дека централното претседателство на партијата ќе треба да ја донесе конечната одлука.
Претходно, пред одржувањето на Централното собрание, Таравари во изјава за една национална телевизија рече дека поканата за влез во Владата ќе ја прифатат само за сериозна борба против корупцијата и ако постојат шанси да се обезбедат 80 пратеници за уставни измени.
Од владиниот партнер на Ковачевски, Алтернатива, реагираа на начинот на кој се водат преговорите за евентуален влез на Алијанса во Владата, нагласувајќи дека немаат намера да преговараат преку медиуми.
„Имаме принципиелен став – кој има проблем, тој треба да ја поднесе цената за да си го реши проблемот. Најпроблематично во целиот процес е што начинот на кој се водат овие разговори, само го разводнува целиот блок партии коj е за ЕУ интеграции. Каква порака кон оние кои го поддржуваат ЕУ проектот праќа овој начин на преговори? Ако се продолжи на овој начин, останатите партии само ќе се отуѓат од овој блок“,
реагираа од Алтернатива.