Ова се смета за зона со среден ризик, каде што продавниците можат да работат, но баровите и рестораните се затворени
Италијанскиот министер за здравство Роберто Сперанца денеска треба да потпише указ со кој поголемиот дел од државата од недела ќе се најде во „портокаловата зона“ на ризик од инфекција со коронавирусот, а полицискиот час од 22 до 5 часот наутро останува во сила.
Во „црвената зона“ ќе биде Ломбардија, регионот најпогоден од првиот бран на вирусот, Сицилија и провинцијата Болзано.
Одлуката на Сперанца се заснова на најновите податоци на Министерството и Институтот за јавно здравје, а забраната ќе остане во сила до 15 февруари.
Новата регулатива предвидува и забрана за патување меѓу региони, освен од деловни и здравствени причини, како и неопходни ситуации.
Зонскиот систем значи дека во најризичната, „црвена зона“, сите ресторани и барови ќе бидат затворени, освен оние што доставуваат храна, а сите продавници што продаваат непрехранбени производи ќе бидат затворени.
Во „портокаловата зона“, која се смета за зона со среден ризик, продавниците можат да работат, но баровите и рестораните се затворени.
Во умерената, „жолта зона“, баровите и рестораните можат да бидат отворени до 18 часот по локално време.