Од соопштението што попладнево го испрати Државниот завод за статистика може да се заклучи дека нема да се бара продолжување на рок за завршување на статистичката операција, која, според важечкиот закон, треба да финишира на 30 септември, односно задутре
Државниот завод за статистика, со сиот расположлив потенцијал, работи непрекинато и според утврдените рокови предвидени во Законот за попис, соопштија попладнево од ДЗС по информациите за можно продолжување на пописната операција за неколку дена, за да се надомести прекинот што настана во почетокот на попишувањето поради проблеми со апликацијата.
Од соопштението што попладнево го испрати Државниот завод за статистика може да се заклучи дека нема да се бара продолжување на рок за завршување на статистичката операција, која, според важечкиот закон, треба да финишира на 30 септември, односно задутре.
„Во последните три дена од пописот на населението, домаќинствата и становите во Северна Македонија, пописните активности на терен се одвиваат непречено и во одредени пописни реони со зголемен интензитет. Помалите пописни реони низ државата веќе завршуваат со попишување на населението и се прават последни завршни проверки. Во одредени урбани средини интензитетот на попишување се зголемува, се вклучуваат дополнителни попишувачи за да може да се посети секое домаќинство и никој да не биде пропуштен“,
соопштија од ДЗС.
Оттаму претходно изјавија за „360 степени“ дека дека најдоцна до утре ќе проценат дали има потреба да се бара продолжување на пописот, кој според законот што го донесе Собранието треба да заврши во рок од 25 дена, односно да трае до 30 септември. Денешните процени на раководството на ДЗС беа дека веројатно нема да има потреба од продолжување на операцијата.