Главната дискусија, на состанокот кој е во рамки на словенечкото претседателство со ЕУ, ќе биде насочена кон улогата на парламентите во враќањето на довербата за процесот на проширување
Претседателот на Собранието Талат Џафери утре ќе учествува на 10. состанок на претседатели на парламенти на земјите од Западен Балкан, во Брдо кај Крањ.
Состанокот, како што соопштија од кабинетот на Џафери, е во организација на Националното собрание на Словенија, а во рамки на словенечкото претседателство со Советот на ЕУ.
Настанот е продолжение на Самитот на претседатели на парламенти од Западен Балкан, кој се организираше пред неколку месеци во Европскиот парламент во Брисел.
Предвидено е во воведниот дел на состанокот свои излагања да имаат претседателот на Националното собрание на Словенија, Игор Зорчич, претседателот на Европскиот парламент, Давид Марија Сасоли, Анже Логар, министер за надворешни работи на Словенија и Моника Грегорич, претседател на Комисијата за надворешна политика на Националното собрание на Словенија.
Од кабинетот на претседателот на македонскиот парламент вела дека главната дискусија ќе биде насочена кон улогата на парламентите во враќањето на довербата за процесот на проширување на ЕУ, за што обраќање ќе имаат претседателите на парламентите од Западен Балкан, вклучително со Џафери.
Исто така, предвидена е дебата со претставници на младите од регионот на Западен Балкан, како дел од дебатата за Конференцијата за иднината на Европа, на која тие ќе имаат можност да искажат свое мислење за тоа во каква Европска Унија сакаат да живеат, до кој степен младите луѓе од Западен Балкан ја гледаат нивната иднина и нивната земја како дел од ЕУ и на кој начин Унијата треба да се реформира за да биде поефикасна, побезбедна и попросперитетна за своите граѓани.
На крајот на состанокот, планирано е усвојување на Заедничка изјава од страна на учесниците, која ќе биде испратена до Европскиот парламент, Европската комисија, до учесниците на претстојниот самит ЕУ – Западен Балкан, како и до Конференцијата на спикери на парламенти на земјите членки на ЕУ.
Кон крајот на оваа седмица, Џафери беше во Будимпешта, Унгарија, на состанок со претседателите на парламентите на ЈИ за проширувањето на ЕУ.