Премиерот на Унгарија, Виктор Орбан, еврокомесарот за проширување Оливер Вархеји и претседателот на унгарското собрание Ласло Ковер ќе имаат свои обраќања во воведниот дел на состанокот
Претседателот на Собранието на Република Северна Македонија, Талат Џафери, утре во Будимпешта ќе учествува на 10. состанок на претседатели на парламенти на земјите од Југоисточна Европа, посветен на проширувањето.
Состанокот, како што соопштија од македонското Собрание, традиционално го организира парламентот на Унгарија, на секои две години. На состанокот, покрај претседателите на парламентите од земјите од Југоисточна Европа, ќе учествуваат и претседателите на парламентите на земјите од Вишеградската група.
Предвидено е во воведниот дел на состанокот свои излагања да имаат премиерот на Унгарија, Виктор Орбан, европскиот комесар за соседство и проширување Оливер Вархеји и претседателот на собранието на Унгарија, Ласло Ковер, по што ќе следат обраќања на претседателите на парламентите на земјите од ЈИЕ, вклучително и на Џафери.
На состанокот е предвидено усвојување и потпишување на заедничка изјава, што ќе биде испратена до националните парламенти на земјите членки на Европската Унија и до лидерите на европските институции.