Рамоз Ручи, Борјана Кришто, Бакир Изетбеговиќ, Глаук Конјуфца, Алекса Бечиќ, Талат Џафери и Ивица Дачиќ заедно со претседателот на Европскиот парламент и претседателите на португалскиот и словенечкиот парламент на вториот Самит во Брисел потпишаа заедничка Декларација од 12 точки
Претседателите на парламентите на земјите од Западен Балкан на Самитот во Брисел, Европски парламент – Западен Балкан усвоија заедничка декларација во која ја потврдуваат централната улога на парламентите во процесот на проширување и се посветуваат на заедничката соработка за понатамошно зајакнување на нејзината парламентарна димензија, вклучително и во поглед на Самитот ЕУ-Западен Балкан во 2021 година.
„Нагласуваме дека парламентите треба дополнително да ја унапредат својата улога како инклузивни простори за дијалог и размена на ставови, поттикнувајќи меѓусебно разбирање и помирување на Западен Балкан, со што директно придонесуваат за мирот, стабилноста, напредокот и посилната демократија во регионот“,
се вели во декларацијата потпишана од Рамоз Ручи, Борјана Кришто, Бакир Изетбеговиќ, Глаук Конјуфца, Алекса Бечиќ, Талат Џафери и Ивица Дачиќ заедно со претседателот на Европскиот парламент и претседателите на португалскиот и словенечкиот парламент, кои го претставуваат сегашното и претстојното претседателство со Советот на Европската Унија.
Меѓу останатите заложби се унапредување на културата на меѓупартиски дијалог и консензус во клучните реформски области, вклучувајќи владеење на правото, фундаментални права и зајакнување на демократските институции со цел да напредуваме на нашиот европски пат, дека независноста на судството, плурализамот, слободата на медиуми, родовата еднаквост и инклузивниот пристап кон граѓанското општество се суштинските европски вредности кои што треба постојано да се поддржуваат и борбата против дезинформации и лажни вести кои го загрозуваат мирот и заемното разбирање во и меѓу општествата.
Во Декларацијата од 12 точки се и заложбата за зајакнување на парламентарната демократија меѓупарламентарни дијалог, важноста на функционалната пазарна економија и заедничкиот регионален пазар како камен-темелник на социоекономската отпорност и европската интеграција на целиот Западен Балкан, посветеност за олеснување на спроведувањето на Економскиот инвестициски план за Западен Балкан на Европската комисија, како и иницијативите одобрени во Софија, во ноември 2020 година – основата за Заедничкиот регионален пазар, Зелената агенда за Западен Балкан и зајакнувањето на дигитализацијата, младинската соработка, важноста од вклучување на претставници на парламентите, граѓанското општество и граѓаните на „шестката“ од Западен Балкан на конференцијата за иднината на Европа…
Претседателите на парламентите од Западен Балкан го повикуваат Советот на Европската Унија да ги исполни своите ветувања и итно да преземе одлучни активности за забрзување на процесот на проширување, а се обврзуваат на соработка за унапредување на законодавството и градење на капацитетите на релевантните комисии за следење на заштитата на животната средина, усогласување на законодавството со ублажувањето и приспсобувањето за климатски промени во согласност со Парискиот договор и Европскиот зелен договор.
На крајот, тие изразуваат благодарност за солидарноста и соработката помеѓу Европската Унија и Западен Балкан во борбата против пандемијата на ковид-19 и последиците и ја поздравуваат финансиската поддршка од Европската Унија за Западен Балкан.