Ако утрешната бројка на новодијагностицирани, од тестирања направени денеска, е приближна на трендот од изминати две недели, вчерашниот скок на новозаразени би се толкувал како варијација, така што, како што објасни Филипче, ќе биде препорачано постепено отворање на институциите
Од резултатите од денешните тестирања за ковид-19 зависи како ќе се димензионирааат понатаму мерките за заштита и социјална дистанца и за постепеното отворање на економијата, најави денеска министерот за здравство Венко Филипче.
Тие резултати, како што рече, се анализираат на утрешните состаноци на Комисијата за заразни болести и на централниот штаб на Владата, по што ќе се знае како точно ќе се димензионираат мерките и кои субјекти прво ќе бидат отворени.
Ако утрешната бројка на новодијагностицирани, од тестирања направени денеска, е приближна на трендот од изминати две недели, вчерашниот скок на новозаразени би се толкувал како варијација, така што, како што објасни министерот, ќе биде препорачано постепено отворање на институциите.
Тие што организираат едукации, курсеви, како иу автошколите би биле први кои ќе почнат да функционираат согласно предлозите.
„Но по овие предлози ќе се дискутира на утрешниот состанок и ќе бидат предложени до Централниот штаб во Владата. Очекувам дискусија и во однос на мерките и во однос на динамиката, но сите тие кои лесно можат да воаспстават ред, дистанца, дезинфекција, носење маски, и оние кои можа да воспостават шалтерски систем ќе имаат приоритет“,
рече Филипче.
За олабавување на мерките за спортистите, Филипче истакна дека се размислува да се дозволат индивидуалните спортови, но потенцира како сетоа тоа понатаму ќе се одвива ќе се знае по утрешните состаноци.
Во врска со скринингот, тој повтори дека доколку има стабилна ситуација и тренд на намалување на пациенти, државата ќе може да премине од едни мерки кои важеа за сите и беа носени на национало ниво кон други, кои ќе бидат креирани по таргетиран скрининг, со кој, како што рече, можат да се откријат мали групи за кои може да важат посебни мерки за да се спречи ширењето таму каде ќе биде вирусот детектиран.
Сега се тестираат пациенти со симптоми, рече, но скринингот ќе ни се овозможи да го надградиме пристапот, кој ќе биде таргетиран на одредени критични групи вработени во здравствени институции, градинки и домови за стари лица за да се откријат асимптоматски носители.
„Бо таа ситуација би се донеле мерки што ќе важат само за тие групи кои сметаме дека се покритични и поризични, односно ќе се открие присуство на вирус, и покрај тоа што се асимптоматски“,
рече тој додавајќи дека активноста ќе се спроведува со матичните лекари и стоматолози, во соработка со центрите за јавно здравје.
Филипче го осуди вчерашниот верски собир во Струга, за кој рече дека е чин на непочитување на здравствените работници и на сите други кои, како што рече, два и пол месеца пожртвувано работат да излеземе од кризата, како и на мнозинството граѓани кои се придржуваат до мерките.
Соопшти дека утрово разговорал со поглаварите на Исламската верска заедница и на Македонската православна црква-ОА, и од нив побарал да ги повикаат верниците да не се собираат.
Во однос на тоа што ИВЗ информирала дека на 12 мај се отвораат џамиите, Филипче нагласи дека е сè уште во сила забраната за групирање на повеќе од двајца и повторно побара од поглаварите на верските заедници да спречат собирања.
„Секое неодговорно собирање ќе нè врати на почеток на епидемијата и во кризата. Исклучително е висок ризикот да се зголеми трансмисијата на вирусот во такви случаи“,
рече министерот за здравство.