„Да беа паметни претставниците на власта и раководството на ’Национални шуми’, немаше на сила да вработуваат пред избори, туку ќе ја дадеа навреме платата како во декември така во јануари и во февруари. Меѓутоа, многу полесно беше да се изманипулираат луѓето, скоро 400 лица да добијат работни места, а сега скоро 2 000 вработени да не добијат плата“, велат од Синдикатот за градежништво, индустрија и проектирање
Од 7 март вработените во „Национални шуми“ ќе почнат штрајк за кој велат дека ќе трае сè до исполнување на нивните барања, а тоа се исплата на редовна и целосна плата за вработените заедно со надоместоците и додатоците на плата како теренски додаток кој не е исплатен скоро една година.
Штрајкот денеска го најавија од Синдикатот за градежништво, индустрија и проектирање (СГИП) од каде што велат дека одлуката е донесена едногласно од две третини од подружниците во државата.
„Штрајкот за кој едногласна одлука донесоа две третини од подружниците во државата нема да се прекине до моментот кога ќе се исплатат платите и додатоците од јануари и февруари заедно со сите надоместоци и додатоци“,
рече на денешната прес-конференција претседателот на СГИП, Иван Пешевски.
Тој обвини и за вработувања на 400 лица, а рече и дека скоро 2 000 вработени немаат земено плата.
„Да беа паметни претставниците на власта и раководството на ’Национални шуми’, немаше на сила да вработуваат пред избори, туку ќе ја дадеа навреме платата како во декември така во јануари и во февруари. Меѓутоа, многу полесно беше да се изманипулираат луѓето, скоро 400 вработени да добијат работни места, а сега скоро 2 000 вработени да не добијат плата. Со вакви лажги пред народот и со вакви ветувања верувајте дека овие луѓе нема да излезат на избори туку ќе излезат пред Влада да протестираат и да штрајкуваат затоа што во прашање е егзистенцијата за скоро 2 000 вработени во ова Јавно претпријатие“,
рече Пешевски.
Како што објасни Пешевски, оправдувањето за новите 400 вработувања било дека има претпријатието потреба од такви вработени, но вели, „магично кај нас во државата сите овие вработувања се пред избори во јавните претпријатија“.
„Ако имале потреба, нека ги задржат. Претходно ги водеа како сезонски работници. Голем дел од нив немаат ни пензиско, ни здравствено, ни плата два, три, четири месеци во годината. Не сме ние мечки да хибернираме, да јадеме и пиеме преку лето, а зимно време да не добиваме никаква плата од државата“,
додаде тој.
Пешевски упати апел до претставниците на власта, вицепремиерот за економски прашања и премиерот да се изнајде решение како овие вработени да добијат навремено плата.
Вработените, додаде тој, ќе бидат доследни на овие барања и нема да отпочнат со работа и никој нема да извршува работа на своето работно место.
„Ако имаат доблест, раководството, менаџментот, после овој момент на неисполнување на барањата, треба да си дадат оставка и да си заминат од претпријатието засекогаш, а не да додаваат проблеми. Нашата одлука е никој да не работи бидејќи никој во моментов не зема плата. Доколку некој смета дека треба да работи, слободно нека си работи. Никој не сака повеќе да извршува работни задачи бидејќи никој не носи дома плата веќе втор месец, а во меѓувреме платите доцнеа по 15-20 дена, беа намалувани без никаква основа, без никакви консултации со синдикалните претставници. Овој хаос сакаме да заврши, конечно да биде почитуван секој вработен во одделот шумарство, бидејќи работат во екстремни услови а не можат дома да однесат плата од 25 илјади во просек“,
рече Пешевски.
Според него, срамно и жално е како никој досега не се заангажирал да го реши проблемот во ова јавно претпријатие.
„Платите минатата година пораснаа, но ние не треба да чекаме милостина за 2 000 денари, овие се луѓе технички персонал, инженерски кадар кои заслужуваат многу повеќе од 40 000 денари плата, а не да зборуваме за плата близу минималната. Овде никој не треба да зема под просек плата, а не да биде илјадарка, две над минималната. Зборуваме за инженерски работни места. ’Национални шуми’ е во 30 града во државата, оваа одлука се однесува за сите. Од сите претходни разговори и преговори и со менаџментот и со власта излеговме изиграни, излажани, изманипулирани“,
додаде Пешевски.
Пешевски како претставник на СГИП апелираше да се стави крај на урбаната мафија којашто владее во Скопје, во делот на градежништвото.
„Тоа што пораснаа цените на становите, сите велат дека пораснаа и платите, меѓутоа некако цените многу повеќе пораснаа од платите на вработените. Доколку некој смета дека треба да биде 2, 3 илјади евра квадрат стан, нека бидат и 2,3 илјади евра плата на градежниот работник“,
изјави тој.