Целта е да има повисоко вреднување на трудот на матичните лекари, но и да се подигне квалитетот на дадените здравствени услуги на осигурените лица, како и да се намали бројот на упатување пациенти на повисоките нивоа на здравствена заштита
Од 1 јануари 2023 година ќе се зголеми вредноста на капитацискиот бод за избраните лекари по општа медицина и гинекологија од 63 на 75 денари, а за матичните лекари стоматолози зголемувањето ќе биде од 48 на 61 денар по пациент.
Ваква одлука вчера на седница донел Управниот одбор на Фондот за здравствено осигурување
Одлуката на Фондот за здравствено осигурување уследи по разговорите и преговорите со Лекарската и Стоматолошката комора, а целта е да има повисоко вреднување на трудот на матичните лекари, но и да се подигне квалитетот на дадените здравствени услуги на осигурените лица.
„Заложбите на Фондот се во насока на унапредување на статусот на избраните лекари во примарната здравствена заштита и потребата од нивно поголемо ангажирање во спроведувањето на претстојните реформи во ПЗЗ“,
велат од Фондот.
Оттаму очекуваат со зголемувањето на капитацискиот бод да се намали и бројот на упатувања пациенти на повисоко ниво на здравствена заштита, како и да се поттикне и обезбеди подобрување на превенцијата со навремено откривање, спречување и сузбивање на незаразни заболувања.
Барањето за зголемување на капитацискиот бод беше и едно од главните во протестите што ги одржаа дел од матичните лекари изминатиот период.