Обвинителството правело претрес во простории на Правниот факултет, а преку соопштение објави дека: одземени се компјутери; во истрагата досега не се пронајдени материјали за испити за идните судии и обвинители; софтверот за приемни испити на Академијата за судии и обвинители не е одземен
Обвинителството за гонење организиран криминал и корупција се огласи за истрагата поврзана со ексгенералниот секретар на Владата, Драги Рашковски, и вели дека е точно оти е направен претрес во просториите на Правниот факултет „Јустинијан Први – Скопје и одземени се компјутери. Станува збор за простории кои ги користел Даниел Станчев, управител на „Инвока гроуп“, фирма преку која, како што беше објавено изминатиот период, бил набавен и софтверот за тестирање на кандидати за Академијата за судии и јавни обвинители.
Досега, тврди обвинителството, не се пронајдени материјали од приемните испити за идните судии и јавни обвинители.
„Во досегашната истрага, не се пронајдени материјали поврзани со приемните испити на слушатели во Академијата на судии и јавни обвинители. Што се однесува до софтверот за полагање на испитот за прием на слушатели во Академијата на судии и јавни обвинители, истиот не е одземен.“,
соопштија од Обвинителството за гонење организиран криминал и корупција.
Преку „Инвока гроуп“ е направена и спорната набавка на софтверот за сообраќајни прекршоци, за која објави „360 степени“. За овој случај потоа беше отворена предистрага, а на 15 април и истрага, а Рашковски Станчев како дел од осомничените се наоѓаат во притвор.
Тие првично добија куќен притвор од судијата на претходна постапка, но обвинителството поднесе жалба по што Кривичниот совет ја прифати и им ја преиначи мерката од куќен во ефективен притвор.
Во истрагата се осомничени уште две лица, меѓу кои е и хонорарец во Владата, на чија фирма се води џипот за кој објавивме дека го води Рашковски. Хонорарецот Игор Христов и уште другото осомничено лице, пак, добија мерки на претпазливост: забрана за напуштање на живеалиштето, обврска да се јавуваат во судот, одземање на пасошите и други патни исправи и забрана за издавање на нови, како и забрана за преземање работни обврски поврзани со кривичното дело.
Истрагата опфаќа три тендери, сите поврзани со софтверот. Според Обвинителството, Рашковски со еден од останатите осомничени ја договорил набавката на софтверот доставувајќи сопствен патент за кој дал насоки да се изготви техничката документација за јавната набавка.
„Четвртоосомничениот како надворешен соработник пренесувал информации за текот на постапката на осомничените – учесници во јавната набавка. Во текот на постапката за јавната набавка наместо комуникацијата да се извршува со користење електронски средства преку Електронскиот систем за јавни набавки, со цел фаворизирање на конкретен економски оператор првоосомничениот лично ги дефинирал техничките спецификации што упатуваат на патентот. На 02.01.2020 година, првоосомничениот донел Одлука за избор на најповолен понудувач за економскиот оператор каде сопственик и управител е второосомничениот и бил склучен Договор за набавка на услуги. Во месец јули истата година економскиот оператор доставил фактура на износ од 4 997 300 денари (околу 81 000 евра) со вклучен 18% ДДВ, па иако софтверот не бил имплементиран, фактурата во рок од седум дена била исплатена“,
соопшти Обвинителството по отворањето на истрагата.
Покрај овој тендер, според Обвинителството, летото 2019 Рашковски донел уште две одлуки за јавна набавка за работи потребни за софтверот, иако во тоа време сè уште не бил склучен договор за негова набавка. Така, за овие два тендери биле склучени договори во износ од 1 416 000 (околу 23 000 евра) и 4 605 021 денари (речиси 75 000 евра).
Така, вкупната сума со која според Обвинителството се стекнале фирмите што ги добиле тендерите, а на штета на државниот буџет, е 11 018 321 денари (речиси 180 000 евра).