Според соопштението од Обвинителството, за напаѓачот на снимателот на телевизиската екипа на ТВ 24 постои сомнение оти сторил кривично дело – насилство, а кај присутните сведоци – новинар и возач на телевизиската екипа предизвикал чувство на несигурност, загрозување и страв. Поради можност од бегство или повторување на делото, Обвинителството предложи куќен притвор за напаѓачот
Основното јавно обвинителство Скопје поведе постапка и предложи куќен притвор за 67-годишникот кој вчера физички го нападна снимателот на ТВ 24 Љубиша Игнатов за време на снимање на инсерти за видео-прилог за потребите на телевизијата
Според соопштението од Обвинителството, за напаѓачот кој вчера воедно беше и приведен во полициската станица во Кисела Вода, постои сомнение оти сторил кривично дело – насилство.
„Пријавениот, на 14 ноември, со грубо навредување и грубо насилство ја загрозил сигурноста на снимател од новинарска екипа, додека кај присутните сведоци – новинар и возач на телевизиската екипа предизвикал чувство на несигурност, загрозување и страв. Осомничениот најпрвин упатил погрдни зборови и пцовки кон новинарската екипа која снимала прилог, а потоа и физички го нападнал снимателот, удирајќи го со лактот во вилицата и нанесувајќи му телесна повреда – набиеница“,
се наведува во соопштението од Обвинителството.
Вчера, напаѓачот на новинарската екипа на ТВ 24 беше приведен во полициска станица Кисела Вода, по добиена пријава од снимателот Љубиша Игнатов, кого најпрво вербално, а потоа физички го нападна.
Вчера попладне, ТВ 24 објави видео прилог во кој се посочи оти снимателот од телевизијата, Љубиша Игнатов, бил физички нападнат со боксови во скопската населба Пржино, каде заедно со новинарска екипа се обидел да сними прилог пред куќата која била пријавена како престојувалиште на украинскиот бизнисмен Олександр Онишченко, за кој неодамна се дозна дека добил македонски пасош. Екипата на ТВ 24 потоа била нападната од 67-годишниот сопстевник на куќата.
По објавениот прилог, Здружението на новинари на Македонија (ЗНМ) побара брза и ефикасна истрага од МВР и институциите во врска со случајот.