Од ЗНМ контактирале со Скопското јавно обвинителство со обвинителката Искра Хаџи Василева која е назначена за предмети поврзани со напади врз медиумски работници за понатамошно процесирање на случајот. Од ЗНМ велат дека ќе ја следат истрагата и ќе инсистира на одговорност од страна на лицето кое физички го нападнал колегата снимател и го спречил физички да ја изврши својата работа
Здружението на новинарите на Македонија (ЗНМ) бара од Министерството за внатрешни работи да спроведе брза и ефикасна истрага за денешниот напад кон колегите од ТВ24.
Денеска, информираат од ЗНМ, за време на снимање на инсерти за видеоприлог за потребите на телевизијата, вербално, а потоа и физички биле нападнати колегите од страна на едно лице.
Од ЗНМ велат дека контактирале со снимателот на ТВ24 Љубиша Игнатов кој го потврдил инцидентот.
,,Додека снимавме инсерти на ул. Пржино, куќа 28/б, во која според избирачки список живее Олександр Онишченко, сопственикот на куќата, извесен Миле, физички ме нападна откако упати пцости и погрдни зборови кон мене. Лицето замавнувајќи со лактот ме удри во пределот на главата и вратот”,
изјави Игнатов за ЗНМ.
Случајот е пријавен во Министерството за внатрешни работи.
ЗНМ бара од Министерството за внатрешни работи да спроведе брза и ефикасна истрага во интерес на пронаоѓање и санкционирање на напаѓачот.
„ЗНМ веднаш контактираше со Скопското јавно обвинителство со обвинителката Искра Хаџи Василева која е назначена за предмети поврзани со напади врз медиумски работници за понатамошно процесирање на случајот. ЗНМ ќе ја следи истрагата и ќе инсистира на одговорност од страна на лицето кое физички го нападнал колегата снимател Игнатов и го спречил физички да ја изврши својата работа“,
велат од Здружението на новинарите на Македонија.
Од таму потенцираат дека заканите по живот се кривични дела предвидени во Кривичниот законик, а МВР и ОЈО треба итно да ги истражат и процесираат, со цел да ги казнат оние кои го прекршуваат законот, но и да превенираат евентуални вакви кривични дела во иднина.