Обвинителството ја овластило полицијата да ги преземе сите потребни истражни дејствија, вклучително и земање изјави кои се поврзани со денешниот случај
Основното обвинителство во Приштина ќе покрене истрага за тепачката што денеска се случи во Собранието на Косово, објавуваат косовските медиуми повикувајќи се на соопштение од обвинителството.
Во соопштението се наведува дека обвинителството ја овластило полицијата да ги преземе сите потребни истражни дејствија, вклучително и земање изјави кои се поврзани со денешниот случај.
„Обвинителството во целосна координација со косовската полиција ќе ги преземе сите дејствија согласно законските одредби до целосно расчистување на случајот“,
се вели во соопштението.
До денешната ескалација на ситуацијата во Собранието на Косово дојде додека премиерот на Косово, Албин Курти, зборуваше од говорница, пратеникот на опозициската Демократскта партија на Косово, Мергим Луштаку, му се доближи и го испрска со вода, по што на овој чин возврати вицепремеирот Бесник Беслими фрлајќи кон него шише вода. Веднаш потоа Луштаку ги турна министрите Хекуран Мурати и Албулена Хаџиу. Во меѓувреме, претседателот на Собранието на Косово ја повика полицијата во собраниската сала, а седницата беше прекината.
Попладнево пратениците на Демократската партија на Косово (ДПК) уште еднаш ја блокираа говорницата на косовското Собрание, откако претседателот Глаук Коњуфца најави одржување на вонредна пленарна седница, која претходно беше прекината.
Неколку членови на Алијансата за иднината на Косово (АБК) им се придружија на членовите на ДПК во блокирањето на седницата.
Коњуфца предложи да се надмине денешната состојба и Парламентот да продолжи со работа.
„Ако сме побројни, ја продолжуваме седницата таму каде што бевме. Дури и премиерот имаше волја да се откаже од зборот. Граѓаните чекаат да продолжиме нормално. Ќе одиме на избори кога сакате“,
рече тој.
Тој побара од пратениците со разбирање да се надминат проблемите и седницата да продолжи со пратенички прашања.