Издадена е наредба за обдукција на телата на починатите, како и за испитување евентуално присуство на алкохол и други супстанции кај повредените. Од местото на несреќата се подигнати траги што ќе бидат предмет на вештачење
Извршен е увид на местото каде што вчеравечер се случи сообраќајната несреќа на патот Кичево-Гостивар, во која загинаа три лица, а осум се повредени, информираат денеска од Јавното обвинителство на Република Северна Македонија.
Оттаму велат дека дежурен јавен обвинител од Основното јавно обвинителство (ОЈО) Кичево заедно со екипи на Министерството за внатрешни работи (МВР) изврши увид на местото на сообраќајката.
„Со цел утврдување на причините за несреќата подигнати се траги од самото место кои ќе бидат предмет на вештачење. Јавниот обвинител издаде наредба за обдукција на телата на починатите, како и за испитување на евентуално присуство на алкохол и други супстанции кај повредените“,
се вели во соопштението од Обвинителството.
Се преземаат и други дејствија по насоки на јавен обвинител.
Од МВР вчеравечер информираа дека во 20:55 часот се случила сообраќајна незгода на патот Кичево-Гостивар, помеѓу Кичево и селото Трапчин Дол, во која учествувале три возила.
Во сообраќајката три лица починале, а осум лица се повредени и дел од нив се пренесени во болницата во Кичево, а дел во Клиничкиот центар „Мајка Тереза“ во Скопје.