Основното јавно обвинителство-Скопје одлучи да вложи жалба до Апелацискиот суд во Скопје за пресудата за случајот кај „Млечен“ каде што во сообраќајка загина маж, а неговата сопруга беше со тешки телесни повреди и од ударот го изгуби и своето неродено бебе.
Од ОЈО-Скопје велат дека повторно го анализирале случајот, по реакциите на оштетената и јавноста, и одлучиле да поднесат жалба до Апелацискиот суд откако ќе ја добијат пресудата на писмено од Основниот суд Скопје.
Тие потсетуваат дека на овој случај дека поднеле обвинителен предлог против едно лице на возраст од 63 години, за кривично дело – тешки дела против безбедноста на луѓето и имотот во сообраќајот од член 300 став 4, во врска со член 297 став 3, во врска со став 1 од Кривичниот законик, за што е предвидена затворска казна од 1 до 5 години.
„Во текот на претходната постапка, од страна на надлежниот јавен обвинител, беа преземени сите потребни истражни дејствија – испитување на обвинетиот, испитување на оштетената, изготвување на сообраќајно-техничко вештачење, изготвување медицинско вештачење за видот и карактерот на повредите на оштетената и прибавување на обдукцискиот протокол од извршената обдукција на оштетениот кој го загуби животот во сообраќајната несреќа“,
велат од ОЈО-Скопје.
Во обвинителниот предлог се вели дека кривичното дело било извршено на 12.10.2018 година, околу 16 часот, кога обвинетиот управувал со патничко моторно возило „ситроен кросер“ по левата сообраќајна лента од улицата „Митрополит Теодосиј Гологанов“ во насока од запад кон исток.
Кога дошол на крстосницата со улица „Анкарска“, на која сообраќајот е регулиран со семафор, на вклучено зелено светло навлегол во лево за да се вклучи на коловозот на улица „Анкарска“, но тука постапил спротивно на Законот за безбедност на сообраќајот на патиштата, па не го испочитувал поставениот сообраќаен знак – забрането свртување кон лево, го променил правецот на движење и свртел кон лево.
Притоа, со предниот лев дел од возилото удрил во левото тркало од мотоциклот марка „дукати“, сопственост и управуван од оштетениот, а на кој како сопатник била неговата сопруга. При судирот, возачот на мотоциклот се здобил со тешки телесни повреди и бил хоспитализиран, но од тежината на повредите починал истиот ден. Со тешки телесни повреди се здобила и неговата сопруга.
„Од анализа на сите обезбедени докази и утврдената состојба, од кривично-правен аспект неспорно произлегува дека обвинетиот кривичното дело го сторил од небрежност, а не од умисла, бидејќи не направил сообраќаен пропуст кој би укажал на тоа дека свесно и волево ја предизвикал штетната последица – на раскрсница навлегол на зелено светло и возилото не го управувал под дејство на алкохол. Сообраќајните пропусти надлежниот јавен обвинител ги исцрпи од извршеното сообраќајно-техничко вештачење. Видот на повредите кои оштетениот ги здобил во сообраќајната несреќа и кои предизвикале смртен исход, надлежниот јавен обвинител ги исцрпи од обдукцискиот протокол изготвен од Институтот за судска медицина, криминалистика и медицинска деонтологија, додека видот и карактерот на повредите на оштетената, јавниот обвинител ги исцрпи од медицинското вештачење врз основа на претходно обезбедената медицинска документација“,
велат од ОЈО-Скопје.
Непосредно пред завршувањето на судската постапка, како што велат од ОЈО-Скопје, од страна на полномошникот на оштетените на јавниот обвинител кој го застапуваше обвинението му била предадена нова медицинска документација која се однесувала на оштетената и нејзината бременост.
„Оваа медицинска документација, надлежниот јавен обвинител ја приложи во дополнение на доказната постапка пред судот. По признанието на вина од страна на обвинетиот, јавниот обвинител во завршен збор детално направи анализа на сите околности во поглед на изборот на видот на кривична санкција и одмерување на истата, при што посебен акцент даде токму на состојбата во која била оштетената и штетните последици кои што настапиле од сообраќајната незгода, како во поглед на смртниот исход кај еден оштетен и предизвикувањето тешки телесни повреди кај оштетената, утврдени врз основа на обезбедените докази во претходната постапка и приложени со обвинението, така и во поглед на новоприложената медицинска документација“,
велат од ОЈО-Скопје.