Поднесен е обвинителен предлог за две лица кои предизвикале верижна сообраќајна несреќа на автопатот Велес-Скопје на 16 јануари минатата година, во која животот го загуби една жена.
Како што информираат од Основното јавно обвинителство во Велес, тие поднеле обвинителен предлог до велешкиот суд против две лица за кривично дело тешки дела против безбедноста на луѓето и имотот во сообраќајот.
На 16 јануари 2020 година околу 9:15 часот, првиот обвинет управувал патнички автомобил на автопатот „Пријателство“, делница Велес-Скопје. Кај местото викано Пуста Кула, после наплатната рампа Отовица, не ја приспособил брзината на движење на возилото кон својствата и состојбата на патот – видливоста, прегледноста и атмосферските услови. Во услови на намалена видливост, поради густа магла и замрзнат и лизгав коловоз, не почитувајќи ги сообраќајните знаци, автомобилот го управувал со брзина од 105 километри на час.
„Како резултат на тоа изгубил контрола врз возилото и застранил десно, па го завртел воланот налево, што предизвикало излизгување на автомобилот, со кој најпрвин удрил во бетонската ограда од вијадуктот, а потоа и во заштитната метална ограда. Се запрел во попречна положба во однос на правецот на движење на автомобилите, зафаќајќи го поголемиот дел од левата и еден дел од десната сообраќајна лента“,
информираат од Обвинителството.
Вториот обвинет, пак, управувал со товарно моторно возило со 0,16 промили алкохол во организмот. Кога пристигнал на местото на кое бил извртен патничкиот автомобил, наместо да го запре товарното возило на посебната лента за принудно запирање, тој го застанал на десната сообраќајна лента, со што целосно го попречил движењето по автопатот. Притоа не презел никакви мерки за отстранување на опасноста или предупредување на останатите учесници во сообраќајот.
Како резултат на ова однесување на двајцата обвинети, настанала верижна сообраќајна несреќа во која учествувале уште еден влекач и четири патнички автомобили. Во несреќата една патничка го загуби животот, а неколкумина беа повредени.