За утре е најавен и концерт на Црвениот плоштад за прослава на присоединувањето на овие четири региони. Неговиот портпарол, Дмитриј Песков, не кажа дали и Путин ќе присуствува на концертот. Таму веќе е поставена бина со огромни екрани и билборди, слично како што беше и при анексијата на Крим во 2014 година
Зеленски во синоќешното обраќање порача дека цената што ќе ја плати руското општество за желбата на еден човек во Москва да ја продолжи оваа војна е тоа што ќе остане без нормална економија и без какво било почитување на човековите вредности
Рускиот претседател Владимир Путин денеска треба да биде домаќин на церемонија во Кремљ на која ќе потпише анексија на четирите региони во Украина (Донецк, Луганск, Запорожје и Херсон) откако во услови на војна беа спроведени т.н. референдуми со чии резултати проруските сили се пофалија дека народот гласал за присоединување кон Русија. Од друга страна, пак, украинскиот претседател Володомир Зеленски порача дека Путин мора да биде запрен за Русија да ги избегне најтешките последици од војната.
Четирите окупирани територии се со површина од 90 000 квадрати километри што е околу 15 отсто од вкупната површина на Украина што е еднакво колку големината на Унгарија или Португалија.
Во пресрет на најавената анексија, Зеленски во синоќешното обраќање порача дека цената што ќе ја плати руското општество за желбата на еден човек во Москва да ја продолжи оваа војна е тоа што ќе остане без нормална економија и без какво било почитување на човековите вредности.
„Тоа сè уште може да се запре. Но, за да се запре, мора да се запре таа една личност во Русија што сака повеќе војна од живот. Од вашите животи, на граѓаните на Русија“,
рече Зеленски.
Путин синоќа го презеде последниот чекор кој го отвора патот кон анексијата – потпиша укази за признавање на независноста на Хесонската и Запорошката област. Покрај денешната церемонија во Кремљ, за утре е најавен и концерт на Црвениот плоштад за прослава на присоединувањето на овие четири региони. Неговиот портпарол, Дмитриј Песков, не кажа дали и Путин ќе присуствува на концертот. На Црвениот плоштад веќе е поставена бина со огромни видеоекрани и билборди, слично како што беше и при анексијата на Крим во 2014 година.
Додека Путин се подготвува за анексија, демократскиот свет излезе со осуда.
Генералниот секретар на Антонио Гутереш рече дека планираните анексии се „опасна ескалација“ и ќе го загрозат мирот.
„Секоја одлука да се продолжи со анексијата нема да има правна вредност и заслужува да биде осудена“,
изјави Гутереш.
Американскиот претседател Џо Бајден, пак, рече дека САД никогаш нема да ги признаат руските претензии на украинската територија и ги осуди референдумите.
„Резултатите беа произведени во Москва“,
рече Бајден.
И американскиот државен секретар Антони Блинкен изјави дека резултатите од референдумот за пристапување на окупираните региони Донецк, Луганск, Херсон и Запорожје кон Русија „не ја одразуваат волјата на народот на Украина“.
„Русија протера голем дел од населението од областите што ги окупираше, притоа принудувајќи ги граѓаните на Украина кои останаа да гласаат под закана со оружје во страв за својата безбедност и безбедноста на своите најблиски“,
рече тој.
Со осуди за референдумите претходно се огласија и европските лидери.
EPA-EFE/SERGEI BOBELYV/SPUTNIK/KREMLIN POOL MANDATORY CREDIT