Погледнете го новото издание на емисијата „360 степени“, емитувано на 16 јуни 2023 г. на ТВ Алсат, во кое гостуваат Ивана Петковска од Коалицијата „Сите за правично судење“ и Васко Маглешов, истражувачки новинар во БИРН
Како ништо од критиките да не допира до членовите на Судскиот совет и на Советот на јавни обвинители, или барем до најголемиот дел од нив. Последна во низата релативизации е за истражувањето под наслов „Проценка на ризиците од корупција во правосудството во Северна Македонија“, презентирано неделава, за кое од челниците на двете клучни тела слушнавме само делумно прифаќање на резултатите кои откриваат дека голем процент од анонимно анкетирани судии и обвинители немаат доверба во тоа како советите ја остваруваат својата уставна и законска улога. А ова е само продолжение на серијата скандали во правосудството во последниот период, чија последна фаза, се чини, почна со тензичната седница на Судскиот совет на 26 април кога беше констатирано дека Весна Дамева е разрешена од претседателка на Судскиот совет, иако за таа одлука гласаа само седум члена, а изборот на претседател се врши со најмалку осум гласа. Колку во позадината на сево ова се политичко-партиски игри за надмоќ и влијание и за унапредување или спасување на „нашите“ судии и обвинители, дебатираме со Ивана Петковска од Коалицијата „Сите за правично судење“, организација што ја следи работата на Судскиот и на Советот на јавни обвинители и Васко Маглешов, истражувачки новинар во БИРН и претседател на Судско-медиумскиот совет.