Коалициските договори за именувања кои задираат во стручните ешалони на власта се процес на поистоветување на партијата со државата, реагираат од Институтот за демократија, по информациите дека ќе се пополнува третиот ешалон на власта
Новите директори на државните институции да се избираат според стручност, а не по принцип на лојалност кон партијата, апелира Институтот за демократија (ИДСЦ) во писмо упатено до премиерот Зоран Заев и вицепремиерот за борба против корупција, за одржлив развој и човечки ресурси Љупчо Николовски.
Повод за писмото се информациите дека наскоро ќе се пополнува третиот ешалон на власта, така што веќе се лицитира со имиња на партиски кадри за нови директори на државни претпријатија и установи, како и за трампа на ресори меѓу владејачките партии.
„Со разочарување ја примивме веста објавена во медиумите дека на наредната владина седница ќе почне именувањето на лица за раководители на неколку јавни институции. Сакаме да веруваме дека се работи за погрешна информација. Граѓаните го заслужуваат најдоброто од човечкиот потенцијал со кој располага земјата. Затоа е исклучително важно при изборот на раководни лица да се овозможи јавна и компетитивна процедура, каде што ќе се пријават повеќе кандидати“,
се наведува во писмото на ИДСЦ до првите луѓе во Владата.
Оттаму велат дека само со натпревар може да им се пружи шанса на лица кои не се членови на политичка партија да раководат со институција и да и помогнат на државата со своето знаење и стручност. Само со јавност, како што се додава во писмото, односно со бележење на целиот процес на избор, за некој во целост да може да го испита, граѓаните ќе се уверат дека се напушта принципот клучен фактор за вработување да е блискоста и лојалноста кон партијата.
„Ако сакате да го спречите иселувањето на најстручните, ќе им дадете шанса да се покажат и во земјава. Во спротивно, тие ќе си најдат друга земја каде што ќе се ценат нивните вештини и знаење. Цената сите ќе ја платиме, со помалку квалитетни услуги за граѓаните. Претходната Влада, предводена од вас, веќе почна процес на законски измени за да се обезбеди подобар избор на раководна служба. Но, и без нов закон, Владата ги има сите инструменти за да направи правилен избор со јасни, јавни и фер процедури.“,
се наведува во обраќањето до Владата.
Од ИДСЦ велат дека очекувањата за подобро управување и напуштање на партискиот клиентелизам и патронажа се јасно искажани на повеќе места, вклучително и во последниот извештај на Европската комисија. Именувањето според партиски и коалициски договори, ќе влијае негативно на следните оценки од граѓанското општество, Европската комисија, Сигма и други меѓународни евалуатори.
„Граѓаните заслужуваат посветеност во исполнување на ветеното и остварување на принципите на праведност и владеење на правото. Коалициските договори за именувања кои задираат во стручните ешалони на власта се во директна спротивност на овие принципи и се процес на поистоветување на партијата со државата“,
реагираат од ИДСЦ.